Տեառնընդառաջի տոնը Թբիլիսիի Սբ. Գևորգ առաջնորդանիստ եկեղեցում

Տեառնընդառաջը հայ ժողովրդի սիրած և ուրախ Տերունի տոներից է, որի տոնակատարությունը Վիրահայոց թեմի եկեղեցիներում ընթացավ եկեղեցական արարողություններով և ժողովրդական ուրախ հանդեսով:

Տոնը սկսվեց 2020 թվականի փետրվարի 13-ին, Թեմի եկեղեցիներում կատարված նախատոնակ-ժամերգություններով: Տեառնընդառաջը Թբիլիսիում մեծ շուքով նշվեց ինչպես Սուրբ Գևորգ առաջնորդանիստ, այնպես էլ Հավլաբարի Սուրբ Էջմիածին եկեղեցիներում:

Թբիլիսիի Սուրբ Գևորգ առաջնորդանիստ եկեղեցում, նախատոնակ-ժամերգությունը կատարվեց Վիրահայոց թեմի առաջնորդական տեղապահ հոգեշնորհ Տեր Կիրակոս վարդապետ Դավթյանի հանդիսապետությամբ: Հոգևոր արարողությանը ներկա էին բազմաթիվ հավատացյալներ:

Մեղմանուշ շարականների ուղեկցությամբ հավատացյալներն ունկնդրեցին Մարիամ Աստվածածնի՝ 40-օրական Հիսուսին Տաճարին ընծայելու տոնի խորհուրդը: Երեկոյան ժամերգությունից հետո առաջնորդական տեղապահի գլխավորությամբ և հոգևոր դասի մասնակցությամբ կատարվեց տարվա առաջին Անդաստանի արարողությունը, որի ընթացքում օրհնվեցին աշխարհի չորս կողմերը: Վառվեցին մոմերը, իբրև Քրիստոսի լույսի խորհրդանիշ:

Տեառնընդառաջի տոնը Ն.Ս.Օ.Տ.Տ. Գարեգին Բ Ամենայն հայոց կաթողիկոսի տնօրինաթյամբ հռչակվել է նորապսակների օրհնության օր: Աստվածահաճո արարողությանը ներկա գտնվելու և Բարձրյալի օրհնությանը արժանանալու փափագով եկեղեցում էին գտնվում այն ամուսնական զույգերը, որոնք պսակադրվել էին անցած մեկ տարվա ընթացքում:

Խորանի կանթեղից վառված Քրիստոսին խորհրդանշող մոմով Հայր Սուրբը եկեղեցու բակում վառեց Տեառնընդառաջի խարույկը՝ կենսատու լույսը փոխանցելով նաև ներկա հավատավոր ժողովրդին:

Վառվեց Տեառընդառաջի ավանդական խարույկը և սկսվեց տոնական հանդիսությունը՝ «Հայարտուն» կենտրոնի «Տարոն» պարային համույթի, մենակատարներ Աիդա Բազոյանի և Վլադիմիր Արությունովի մասնակցությամբ: Համերգը վարեց Թեմի մշակույթի բաժնի տնօրեն Սուրեն Աբրամյանը: Սուրբ Գևորգ եկեղեցու խաչքավոր Յուրի Երեմյանի աջակցությամբ կազմակերպվեց նորապսակների հյուրասիրություն:

Փետրվարի 14-ին Սուրբ Գևորգ առաջնորդանիստ եկեղեցում, Տեառնընդառաջի տոնի կապակցությամբ տրվեց տոնական Սուրբ Պատարագ, որի Պատարագիչն էր արժանապատիվ Տեր Հուսիկ քահանա Հարությունյանը:

20200214 113820

A1

20200213

  • Created on .
  • Hits: 294

Կոնտակտ

5, Samghebro St., 0105 – Tbilisi, Georgia
Phone: +995322922248
+995322754111
Email: Այս էլ-փոստի հասցեն ծածկագրված է թափոնափոստի բոթերից։ Այն տեսնելու համար անհրաժեշտ է միացնել JavaScript։