Բուն Բարեկենդանը Թբիլիսիում նշվեց հարիսայի փառատոնով

2021 թվականի փետրվարի 14-ին Հայ Առաքելական Սուրբ Եկեղեցու տոնացույցով նշվեցին Տյառնընդառաջը և Բուն Բարեկենդանը: Տոնական օրը Վիրահայոց Թեմի գործող եկեղեցիներում նշանավորվեց Սուրբ և Անմահ Պատարագով: Թբիլիսիի Հավլաբարի Սուրբ Էջմիածին եկեղեցում Վիրահայոց թեմի առաջնորդական տեղապահ հոգեշնորհ Տեր Կիրակոս վարդապետ Դավթյանի հանդիսապետությամբ Սուրբ Պատարագ մատուցեց արժանապատիվ Տեր Սամվել քահանա Թորոսյանը:

Բուն Բարեկեդանին էր նվիրված նաև ավանդական հարիսայի փառատոնը, որը թեմի առաջնորդարանի և «Հայարտուն» ու «Հովհաննես Թումանյանի տուն» կենտրոնների աջակցությամբ կազմակերպել էր Վրաստանի հայ կանանց «Շուշանիկ» միությունը: Թբիլիսահայ համայնքում գեղեցիկ այս փառատոնը անց է կացվում 2012 թվականից անընդմեջ, տարեցտարի ընդարձակվելով այն վերածվել է ժողովրդական տոնահանդեսի:

Հավլաբարի Սուրբ Էջմիածին եկեղեցու բակում սեղանների վրա շարված շուրջ երկու տասնյակ կաթսաներից տարածվում էր յուղալի և համեղ հարիսայի բույրը՝ ներդաշնակված տարբեր թթուներով և այլ ուտեստներով:

2Չնայած քաղաքային տրանսպորտի բացակայությանը, բազմամարդ էր եկեղեցու բակը: Միջոցառմանը ներկա էին հոգևոր հայրերը, Վրաստանում ՀՀ դեսպանության դիվանագետներ, վիրահայ համայնքի անդամներ:

Միջոցառումը բացեց Վրաստանի հայ կանանց «Շուշանիկ» միության նախագահ Սուսաննա Խաչատրյանը: Նա կարևորեց միջոցառման նպատակը՝ Մեծ Պահքի նախօրեին նշվող ավանդական հարիսայի փառատոնով պահպանել և սերունդներին փոխանցել ազգային այս կերակրատեսակը, ժողովրդական ավանդույթները և սովորությունները: Նա առանձնահատուկ շնորհակալություն հայտնեց Վիրահայոց թեմի առաջնորդարանին, Սուրբ Էջմիածին եկեղեցու հոգևոր դասին, եկեղեցու խաչքավոր Գրիգորի Նալբանդյանին և բազում հավատացյալների, ում աջակցությամբ և հովանավորությամբ ապահովվեց հարիսայի փառատոնի իրականացումը:

Վիրահայոց թեմի առաջնորդական տեղապահ հոգեշնորհ Տեր Կիրակոս վարդապետ Դավթյանը շնորհավորեց ներկաներին եկեղեցական երկու տոների՝ Տյառնընդառաջի և Բուն Բարեկենդանի կապակցությամբ և մաղթեց ամուր կամքով և անսասան հավատքով անցնել Մեծ Պահքի ժամանակաշրջանն ու դիմավորել Տեր Հիսուս Քրիստոսի հրաշափառ Հարության տոնը:

Օրհնվեցին սեղանները ու սկսվեց հարիսայի համտեսն ու հյուրասիրությունը ուրախ երգ-երաժշտության ուղեկցությամբ: Բուն բարեկենդանի և հարիսայի պարգևած ուրախ տրամադրությունը երկար ժամանակ թևածում էր շուրջբոլորը: Օրհնված հարիսա փոխանցվեց նաև հիվանդներին և տարեցներին:

3

Սբ. Էջմիածին

  • Created on .
  • Hits: 263

Կոնտակտ

5, Samghebro St., 0105 – Tbilisi, Georgia
Phone: +995322922248
+995322754111
Email: Այս էլ-փոստի հասցեն ծածկագրված է թափոնափոստի բոթերից։ Այն տեսնելու համար անհրաժեշտ է միացնել JavaScript։