საქართველოს სომეხთა ეპარქიის „ჰოვანეს თუმანიანის სახლი“ ცენტრში დედაენის დღე აღინიშნა

14 აპრილი საქართველოში დედაენის დღედ არის გამოცხადებული. დღესასწაულის აღსანიშნავად, საქართველოს სომეხთა ეპარქიის „ჰოვანეს თუმანიანის სახლი“ სამეცნიერო, კულტურულ-საგანმანათლებლო ცენტრში, ეპარქიის წინამძღვრის მისი ყოვლადუსამღვდელოესობის ეპისკოპოს კირაკოს დავთიანის ლოცვა-კურთხევით, გაიმართა ლიტერატურულ-მუსიკალური ღონისძიება, რომელშიც მონაწილეობდნენ ქ. თბილისის 103-ე ქართულ-სომხური საჯარო სკოლის მოსწავლეები (დირექტორი: არჩილ ჩხაიძე) პედაგოგების გაიანე პეტროსიანის, ნინო კობახიძისა და ნინო იაკობიძის ხელმძღვანელობით, ქ. თბილისის 104-ე სომხურენოვანი საჯარო სკოლის (დირექტორი: ირინა ჟამკოჩიანი) მოსწავლეები, პედაგოგის, მარეტტა შახდინარიანის ხელმძღვანელობით, აგრეთვე სტუდენტები, პროფესორები, სომეხი და ქართველი საზოგადოების წევრები.

ცენტრის ექსკურსიამძღოლმა გოჰარ მაზმანიანმა ქართველი ხალხის მრავალსაუკუნოვან ისტორიაზე, ერის თვითმყოფადობის შენარჩუნებაში ენის მნიშვნელობასა და როლზე საუბრისას, ხაზი გაუსვა ერის დიდებულთა შეფასებას, რომლის თანახმადაც სახელმწიფო ენა ქვეყნის ღირსების საზომია.

ქართული ენის საქართველოს სახელმწიფო ენად გამოცხადების და დედაენის დღის აღნიშვნის ისტორიაზე ისაუბრა ა/ო „საქართველოს სომეხთა სათვისტომოს“ წევრმა მია დარსანიამ.

ათასწლოვანი ისტორიის მქონე ქართული ენის, როგორც ეროვნული სიმტკიცის, უნიკალური დამწერლობისა და ანბანის შენარჩუნების გარანტზე, აგრეთვე, სომხურ-ქართულ მრავალსაუკუნოვან განუყრელ მეგობრობასა და საქართველოში მცხოვრები სომეხი მოსახლეობის, კერძოდ, ახალგაზრდების ქართულ სამოქალაქო საზოგადოებაში ინტეგრაციის პროცესის განვითარებაზე ისაუბრეს საქართველოს საზოგადოებრივი რადიოს „ოქროს ფონდის“ წარმომადგენელმა, პოეტმა  ლილი გოგებაშვილმა, არმენოლოგმა, ფილოლოგიის მეცნიერებათა დოქტორმა, საქართველოს საელჩოს ყოფილმა დიპლომატმა სომხეთის რესპუბლიკაში ნინო აფციაურმა და საქართველოს სომეხთა ეპარქიის პრესსპიკერმა სუსანა ხაჩატრიანმა.

სასიამოვნო და შინაარსობრივი ლიტერატურული მონტაჟით დამსწრეთა წინაშე წარდგნენ 104-ე და 103-ე საჯარო სკოლების მოსწავლეები, ხოლო 62-ე სკოლის მოსწავლემ ნატალია მირზოიანმა ქართულ ენაზე წაიკითხა ჰოვანეს თუმანიანის ლექსი „უძველესი კურთხევა“ (სომხ. «Հին օրհնություն»), რომლის თარგმანიც იოსებ გრიშაშვილის მიერ არის შესრულებული.

დედაენის დღისადმი მიძღვნილი ღონისძიების შესაფერისი სომხური და ქართული ცეკვები შეასრულეს ქორეოგრაფიულმა ანსამბლებმა „ვანქი“, „ჯეირანი“ და „მუში“ (სამხატვრო ხელმძღვანელები - ლიანა კაშავანიძე და სვეტლანა ერიციანი).

დედაენის დღისადმი მიძღვნილი ღონისძიება ნამდვილადაც რომ სომხურ-ქართული მეგობრობის ისტორიის კიდევ ერთ სასიამოვნო ფურცლად იქცა.