Материалы

აღდგომის ბრწყინვალე დღესასწაული საქართველოს სომეხთა ეპარქიაში

2022 წლის 17 აპრილს, ჩვენი იესო ქრისტეს აღდგომის ბრწყინვალე დღესასწაული საქართველოს სომეხთა ეპარქიაში მრავალრიცხოვანი მრევლის მონაწილეობით, სომხური ეკლესიის წესისა და რიტუალების თანახმად აღინიშნა.

მრავალრიცხოვანი მრევლი იყო შეკრებილი თბილისის სურბ გევორგ მთავარ საკათედრო ტაძარსა და ავლაბრის სურბ ეჯმიაწინ ეკლესიაში, ეკლესიების ეზოებსა და მიმდებარე ტერიტორიაზე. მორწმუნეები ეკლესიებში მოდიოდნენ ოჯახებთან ერთად, დღესასწაულთან დაკავშირებით შეღებილი კვერცხებით, ტკბილეულითა და სანთლებით მორთული კალათებით. საღმრთო ლიტურგიას ესწრებოდნენ თემის ოფიციალური პირები, განათლებისა და კულტურის მოღვაწეები და მორწმუნეები.

თბილისის სურბ გევორგ მთავარ საკათედრო ტაძარში, აღდგომის დღესასწაულზე აღვლენილ საღმრთო ლიტურგიას დაესწრნენ საქართველოს რელიგიის საკითხთა სახელმწიფო სააგენტოს ხელმძღვანელი ზაზა ვაშაყმაძე და სააგენტოს თანამშრომლები.

2

დღესასწაული ეკლესიებში დაიწყო ღვთისმსახურებებითა და ანდასტანით. ეპარქიის სურბ გევორგ მთავარ საკათედრო ტაძარში, იესო ქრისტეს აღდგომის ბრწყინვალე დღესასწაულთან დაკავშირებით საღმრთო ლიტურგია აღავლინა ეპარქიის წინამძღვრის ნაცვალმა არქიმანდრიტმა კირაკოს დავთიანმა.

საღმრთო ლიტურგიის მიმდინარეობისას, სულიერმა მოძღვარმა სრულიად სომეხთა კათოლიკოსის, უწმინდესის და უნეტარესის გარეგინ II-ის სააღდგომო ეპისტოლე წაიკითხა.

ეპარქიის წინამძღვარმა, აღდგომის მნიშვნელობაზე საუბრისას სააღდგომო ქადაგებაში აღნიშნა, რომ აღდგომის ბრწყინვალე დღესასწაული კეთილის ბოროტზე და სინათლის სიბნელეზე გამარჯვების დღესასწაულია. წმინდა მამამ ისურვა, რომ კეთილის გამარჯვებამ მოუტანოს სინათლე სომხეთსა და საქართველოს, მშვიდობა დამკვიდრდეს უკრაინაში და ომის სისასტიკიდან დაცულნი იყვნენ ქვეყნები და ხალხები. მწირველმა წმინდა მამამ ქართველ ქრისტიან ხალხს ბზობის დღესასწაული მიულოცა, რომელსაც ქართული ეკლესია დღეს ზეიმობს.

ეკლესიის ეზოში გაიმართა სადღესასწაულო გამასპინძლება. მორწმუნეები ამაღლებული განწყობით ულოცავდნენ ერთმანეთს ქრისტეს აღდგომის ბრწყინვალე დღესასწაულს, ლოცულობდნენ მსოფლიოში მშვიდობის და ადამიანების ჯანმრთელობისათვის.

აღდგომის ბრწყინვალე დღესასწაულისადმი მიძღვნილი საღმრთო ლიტურგია აღევლინა საქართველოს სომეხთა ეპარქიის ქ. ბათუმში, ქ. რუსთავში, სამცხე-ჯავახეთის და ქვემო ქართლის რეგიონებში მოქმედ სომხურ ეკლესიებსა და სასულიერო ცენტრებში. ყველგან სომეხი მრევლისათვის აღდგომის ბრწყინვალე დღესასწაულის მისალოცად იყვნენ მისულები ოფიციალური პირები და სხვადასხვა ეროვნების მორწმუნეები.

ორშაბათს, ეკლესიებში აღვლენილი წმინდა წირვის შემდეგ, მიცვალებულთა სულების მოსახსენიებელი პანაშვიდის წესი შესრულდება.

3

დაკავშირება

საკონტაქტო ინფორმაცია:
სამღებროს ქ. №5, 0105 – თბილისი, საქართველო
ტელეფონი: +995322922248
ელ-ფოსტა: ელ-ფოსტის ეს მისამართი დაცულია სპამ-ბოტებისგან. ნახვისთვის უნდა გქონდეთ ჩართული JavaScript.

 ©2022 Վիրահայոց թեմ. Բոլոր իրավունքները պաշտպանված են