მიწისძვრის მსხვერპლთა ხსოვნა დაუვიწყარია

7 დეკემბერი სპიტაკში, სომხეთში მომხდარი კატასტროფული მიწისძვრის მსხვერპლთა ხსოვნის დღეა. ამ დღეს ხალხის ნაკადი ყველა სომხურ ეკლესიაში არ წყდება. ხალხი თავდახრილი, სევდიანი გამომეტყველებითა და გულში მწუხარებით მოდის. და მიუხედავად იმისა, რომ ტკივილი რამდენიმე ათწლეულის წინანდელია, ამას ყოველთვის იხსენებენ გულისტკივილით, დანაკარგის სიმწრითა და პასუხის მოლოდინით კითხვაზე - რატომ?!. ხალხის ნაკადი კი მოდის, რათა ხსენების სანთელი აანთონ ლოცვასთან ერთად და შეწყალება ითხოვონ...

საქართველოს სომეხთა ეპარქიის ავლაბრის სურბ ეჯმიაწინის ეკლესიაში, ხსოვნის დღე  ეპარქიის წინამძღვრის, მისი  ყოვლადუსამღვდელოესობის ეპისკოპოსის კირაკოს დავთიანის ხელმძღვანელობით აღინიშნა საღვთო ლიტურგიით, რომელსაც ღირსი მამა კირაკოს მღვდელი სიმონიანი აღასრულებდა.

აღსანიშნავია, რომ მრავალ თბილისელ სომეხთან ერთად, წმ. ლიტურგიას ესწრებოდა 1988 წელს საქართველოს სსრ კომუნისტური პარტიის ცენტრალური კომიტეტის  პირველი მდივანი - ჯუმბერ პატიაშვილი. მიწისძვრის შესახებ ინფორმაციის მიღებისთანავე, ეს უკანასკნელი ერთ-ერთი პირველი იყო, ვინც სტიქიური უბედურების შედეგად მიყენებული ნგრევა იხილა და დაზარალებულ სომეხ ხალხს დახმარება გაუწოდა. მიუხედავად იმისა, რომ 37 წელი გავიდა, ბატონი პატიაშვილი, წინა წლების მსგავსად, წელსაც მოვიდა, რათა პატივი მიეგო მსხვერპლთა ხსოვნას და ელოცა ყველა ხალხის ასეთი უბედურებებისგან დასაცავად.

ღვთაებრივი ლიტურგიის დასასრულს, საქართველოს სომეხთა ეპარქიის წინამძღვრის თავმჯდომარეობით პანაშვიდი აღევლინა. ეპარქიის წინამძღვარმა, მისმა ყოვლადუსამღვდელოესობამ ეპისკოპოსმა კირაკოს დავთიანმა, დამსწრეებს ქადაგებაში მოუწოდა არ დაგვავიწყდეს მიწისძვრის უდანაშაულო მსხვერპლთა ხსოვნა, ვიცხოვროთ ღვთის, ჩვენი ეკლესიისა და ჩვენი ერისადმი დიდი სიყვარულით.

მორწმუნეებმა ეპარქიის „ჰაიარტუნ“ ცენტრში  ნახეს  1988 წლის სპიტაკის მიწისძვრის მსხვერპლთა ხსოვნას მიძღვნილი არუსიაკ სიმონიანის  ფილმი - „ჩემი ახალი წელი“, რომელმაც დედა ექვსი წლის ასაკში დაკარგა სპიტაკის მიწისძვრის დროს. ეს დღე, რომელიც სავსე იყო სტიქიური უბედურების საშინელი განადგურების მოგონებებით, ასევე გახდა მოწოდება სიყვარულით, რწმენითა და ერთიანობით ცხოვრებისკენ.