მიჯინქი - დიდი მარხვა გაშუალედდა

2025 წლის  26 მარტს, ქრისტიანთათვის დიდი მარხვის პერიოდი გაშუალედდა, ვინაიდან იგი დიდი მარხვის 24-ე დღეა, და მას მიჯინქ (შუალედი) ეწოდება .

საქართველოს სომეხთა ეპარქიის თბილისის სურბ გევორგ მთავარ საკათედრო ტაძარში მიჯინქი ეპარქიის წინამძღვრის მისი ყოვლადუსამღვდელოესობის ეპისკოპოს კირაკოს დავთიანის საპატიო წინამძღოლობით ჩატარებული „სიმშვიდის“ საღამოს ღვთისმსახურებით აღინიშნა.

ღვთისმსახურების დასასრულს ეპარქიის წინამძღვარმა დამსწრე მორწმუნეები დალოცა. წმინდა მამამ დღის მნიშვნელობაზე საუბრისას მორწმუნეებს უსურვა, რომ დიდმარხვის მეორე ნახევარი სიყვარულითა და რწმენით, სულიერი სიწმინდითა და ლოცვით გაიარონ, გააგრძელონ მარხვის პერიოდი, სულიერად განმტკიცებულები და გაძლიერებულები შეეგებონ იესო ქრისტეს ბრწყინვალე აღდგომას - სურბ ზატიკს.

მორწმუნე სომეხი ხალხის მიერ მიჯინქის დღესასწაული ხალხური წეს-ჩვეულებებისა და ტრადიციების მიხედვითაც აღინიშნება. მიჯინქის დღესასწაულის სიმბოლოდ მიჩნეული ქადის ან ბაღარჯის გამოცხობის ტრადიცია კვლავ გრძელდება და დღესაც თბილისის სომხური ტაძრების წმინდა საკურთხეველზე დაწყობილი იყო უგემრიელესი ქადები. ტრადიციის თანახმად, მიჯინქის ქადებში ყოველთვის იდება რაიმე ნიშანი. მიიჩნევა რომ ვისაც ნიშანი შეხვდება მას წარმატებული წელი ექნება. დედაქალაქის ორივე მოქმედ ტაძარში - სურბ გევორგ მთავარ საკათედრო ტაძარსა და ავლაბრის სურბ ეჯმიაწინ ეკლესიაში ნაკურთხი ქადები ხალხს დაურიგდა. ზოგიერთ მათგანს ტრადიციული ნიშანი შეხვდა: ეკლესიის ჯვრის ნათლიების - არკადი ჰოვაკიმიანისა და კარენ დარბინიანის ინიციატივით ქადებში მოთავსებული იყო ნაკურთხი ჯვრები, რაც ბევრისთვის სასიამოვნო სიურპრიზი აღმოჩნდა.

მიჯინქის დღესასწაული საზეიმოდ აღინიშნა აგრეთვე საქართველოს სომეხთა ეპარქიის სხვა მოქმედ ტაძრებში. დიდმარხვის 24-ე დღე ყველგან დღესასწაულად იქცა და გვაუწყა დიდი მარხვის გაშუალედება.