Միջինք՝ Մեծ Պահքը կիսվեց

2025 թվականի  մարտի 26-ին  Քրիստոնյաների համար Մեծ Պահքի շրջանը կիսվեց, քանզի այն Մեծ Պահքի 24-րդ օրն է և կոչվում է Միջինք: 

Վիրահայոց թեմի Թբիլիսիի Սբ. Գևորգ առաջնորդանիստ եկեղեցում Միջինքը նշվեց թեմակալ  առաջնորդ Գրշ. Տեր Կիրակոս եպս. Դավթյանի հանդիսապետությամբ կայացած «Հանգստյան» երեկոյան ժամերգությամբ:

 Հավարտ ժամերգության ներկա հավատացյալներին իր օրհնությունը բաշխեց Թեմի առաջնորդը:  Սրբազան Հայրը անդրադարձ կատարելով օրվա խորհրդին, հավատացյալներին մաղթեց սիրով ու հավատքով, հոգու մաքրությամբ ու աղոթքներով  անցնել Պահքի երկրորդ կեսը և  շարունակելով Պահեցողության  շրջանը, հոգեպես ամրապնդված ու զորացած հասնել Քրիստոսի Հրաշափառ Հարության տոնին՝ Սուրբ  Զատիկի տոնակարությանը:

Հայ հավատավոր ժողովուրդը Միջինքը նշում է նաև ժողովրդական սովորություններով ու ավանդույթներով: Հավատարիմ մնալով Միջինքը նշանավորող բաղարջ կամ գաթա թխելու սովորությանը, Թբիլիսիի հայոց եկեղեցիների Սբ. Խորաններին շարված  էին անուշահամ գաթաները:  Ըստ ավանդույթի՝ Միջինքի գաթաների մեջ պարտադիր դրվում է որևէ նշան: Ում բաժնից նշանը դուրս գար, այդ տարվա ընթացքում նրա հաջողությունն ապահովված էր համարվում։ Երկու եկեղեցիներում՝ Սբ. Գևորգ  առաջնորդանիստ և Հավլաբարի Սբ. Էջմիածին  եկեղեցիներում օրհնված գաթանները բաժանեցին ժողովրդին: Նրանցից ոմանց ընկան ավանդական նշանը՝ եկեղեցիների խաչի քավորներ Արկադի Հովակիմյանի և Կարեն Դարբինյանի  նախաձեռնությամբ գաթաների մեջ զետեղված օրհնված խաչերը, որոնք գեղեցիկ անակնկալ դարձան շատերի համար:

Միջինքի տոնը հանդիսավորությամբ նշվեց նաև Վիրահայոց թեմի գործող մյուս եկեղեցիներում: Ամենուրեք օրը դարձավ տոնական՝ ավետելով Մեծ Պահքի կիսվելը: