საახალწლო ზეიმი სურბ მოვსეს ხორენაცის სახელობის საბავშვო ბაღში

რამდენიმე დღეში  ისტორიას დარჩება 2024 წელი და პლანეტა დედამიწაზე ახალი - 2025 წლის ათვლა დაიწყება. ყველგან დიდი სამზადისია ახალი წლის სათანადოდ დასახვედრად, თუმცა მას განსაკუთრებით მოუთმენლად ელიან პატარები.

2024 წლის 25 დეკემბერს, სადღესასწაულოდ მორთული ცენტრ „ჰაიარტუნის“ დარბაზში ადგილები დაეკავებინათ ღირს მღვდელ სამველ თოროსიანს, ცენტრის წარმომადგენლობას, ეპარქიის თანამშრომლებს, მშობლებს, სტუმრებს.

საუფლო ლოცვის შემდეგ, საქართველოს სომეხთა ეპარქიის განათლების განყოფილების ხელმძღვანელმა და ცენტრ „ჰაიარტუნის“ დირექტორმა ევგენია მარკოსიანმა დამსწრეებს ეპარქიის წინამძღვარს მისი ყოვლადუსამღვდელოესობის ეპისკოპოს კირაკოს დავთიანის ლოცვა-კურთხევა და კეთილი სურვილები გადასცა, ხაზი გაუსვა ღონისძიებას, როგორც სურბ მოვსეს ხორენაცის სახელობის საბავშვო ბაღის საანგარიშო ღონისძიებას და ასპარეზი საბავშვო ბაღის აღსაზრდელებს დაუთმო.

მასწავლებლებისა და მშობლების მხარდაჭერით აღსაზრდელები ახალ წელს „ტყეში“ შეხვდნენ. სხვადასხვა ცხოველის კოსტიუმში გამოწყობილი აღსაზრდელები სიხარულით შეეგებნენ თოვლის ბაბუას და ნორჩ ახალ წელს. ბავშვებმა სიმღერით, ცეკვით, ლექსებით და თამაშებით გაამხიარულეს თოვლის ბაბუ და ნორჩი ახალი წელი. თოვლის ბაბუმ, როგორც ყოველთვის, ბავშვებს ულამაზესი საჩუქრები აჩუქა.

მიმდინარე საახალწლო ზეიმი დატვირთული იყო სიურპრიზებით. საბავშვო ბაღის აღსაზრდელებს საჩუქრად გადაეცათ საქართველოს სომეხთა ეპარქიის „ჰოვანეს თუმანიანის სახლი“ ცენტრის ინიციატივით და ეპარქიის საწინამძღვროს მხარდაჭერით, გამომცემლობა „აკტუალ არვესტ“-ის მიერ, ახლახან გამოცემული ჰოვანეს თუმანიანის ზღაპრების ილუსტრირებული კრებული, ხოლო ეპარქიის სურბ გევორგ მთავარი საკათედრო ტაძრის ჯვრის ნათლიამ სამველ პოღოსიანმა მათ რბილი სათამაშოები და ტკბილეული აჩუქა.

საბავშვო ბაღის აღსაზრდელთათვის მოულოდნელი იყო საერთაშორისო კომპანია McDonald's-ის გამასპინძლება და საჩუქრები.

საქართველოს სომეხთა ეპარქიის „სურბ მოვსეს ხორენაცის“ სახელობის საბავშვო ბაღის პედაგოგები, მშობლები და აღსაზრდელები მადლობას უხდიან ეპარქიის წინამძღვარს მის ყოვლადუსამღვდელოესობას, ეპისკოპოს კირაკოს დავთიანს, „ჰოვანეს თუმანიანის სახლი“ სამეცნიერო-კულტურულ ცენტრს, ეკლესიის ჯვრის ნათლია სამველ პოღოსიანს და საერთაშორისო კომპანია McDonald's-ის ხელმძღვანელობას საახალწლო ზეიმის გახალისების და დაუვიწყარი ემოციებისათვის.