Материалы

Վիրահայոց թեմի առաջնորդական տեղապահի հերթական այցը Ջավախք

2020 թվականի սեպտեմբերի 23-24-ին, Վիրահայոց թեմի առաջնորդական տեղապահ հոգեշնորհ Տեր Կիրակոս վարդապետ Դավթյանը, առաջնորդական այցով գտնվում էր Սամցխե-Ջավախքի և Ծալկայի փոխառաջնորդությունում:

Ախալքալաքի փոխառաջնորդության նստավայրում թեմակալ առաջնորդը հանդիպում ունեցավ տեղի հոգևոր դասի հետ, քննարկեց առկա խնդիրները և հուզող հարցերը:

Հոգեշնորհ Տեր Կիրակոս վարդապետը հետաքրքրվեց Ախալքալաքի շրջանի գյուղերում ընթացող եկեղեցների և տաճարների վերանորոգության և շինարարության հարցերով, ծանոթացավ աշխատանքների ընթացքին, տվեց անհրաժեշտ հանձնարարություններ:

Այնուհետև առաջնորդական տեղապահը, արժանապատիվ Տեր Նարեկ քահանա Տիգրանյանի ուղեկցությամբ, այցելեց Գոման գյուղ, ծանոթացավ 19-րդ դարի կառույց Սուրբ Գրիգոր Լուսավորիչ եկեղեցու ներկա վիճակին և տվեց համապատասխան ցուցումներ՝ աշխատանքների հետագա ընթացքը եկեղեցական կանոններին համապատասխան իրականացնելու համար:
120204171 329619434815014 2619092776164509941 N
Ջավախք այցելության հաջորդ օրը,Վրաց Ուղղափառ Եկեղեցու Ախալքալաքի և Գումբուրդոյի միտրոպոլիտ Նիկոլոզ Փաչուաշվիլին իր նստավայրում ընդունեց առաջնորդական տեղապահին: Հանդիպման ընթացքում հոգևոր առաջնորդները քննարկեցին երկու քրիստոնյա Եկեղեցիների համագործակցության հարցերը, որոնք պետք է զարգանան միմյանց արժեքները գնահատելու և փոխադարձ հարգանքի, երկու Եկեղեցիների առաջընթացի հիմքերի վրա: Հոգևոր առաջնորդները երկուստեք միանշանակ կարևորեցին ժողովուրդներին հավատքին և Եկեղեցուն մերձեցնելու խնդիրները, տարածաշրջանի եկեղեցիների վերանորոգության, հիմնանորոգման և նոր եկեղեցիների շինարարության հետ կապված հարցերը:

Միտրոպոլիտ Նիկոլոզը Կիրակոս վարդապետին հրավիրեց Սուրբերին նվիրված իր հիմնադրած թանգարանը, ցույց տվեց այստեղ տեղ գտած Սուրբերի սրբապատկերները, տարբեր մատենագրություններ, պատմեց դրանց հետքերով կատարած իր ուսումնասիրությունների մասին: Տեր Կիրակոսը գնահատանքի խոսքեր ուղղեց միտրոպոլիտին՝ հանուն քրիստոնյա հավատքի ծավալած գործունեության համար:

Սեպտեմբերի 24-ին հոգեշնորհ Տեր Կիրակոս վարդապետ Դավթյանը վերադարձավ Թբիլիսի:

Վիրահայոց թեմի առաջնորդական տեղապահին Ջավախք կատարած այցի ընթացքում ուղեկցում էր թեմի վարչատնտեսական բաժնի տնօրեն Կարեն Երիցանը:

Կոնտակտ

5, Samghebro St., 0105 – Tbilisi, Georgia
Phone: +995322724111
Email: Այս էլ-փոստի հասցեն ծածկագրված է թափոնափոստի բոթերից։ Այն տեսնելու համար անհրաժեշտ է միացնել JavaScript։

 ©2024 Վիրահայոց թեմ. Բոլոր իրավունքները պաշտպանված են