Материалы

Վիրահայերի աջակցությունը Սուրբ Էջմիածին եկեղեցու վերանորոգչական աշխատանքներին

Թբիլիսահայությունն իր  սերն ու ակնածանքը համայն հայությանը համախմբող և զորավոր ուժ ունեցող Մայր Աթոռ Սուրբ Էջմիածնի նկատմամբ արտահայտել է դեռևս 19-րդ դարում իր իսկ  հանգանակությամբ  կառուցած  Սուրբ Էջմիածին անունով Հավլաբարի  եկեղեցին: Դա  նաև հայ հավատացյալի անմնացորդ նվիրումն է իր Սուրբ տաճարին:

Ի արձագանք Վաղարշապատում ընթացող դարակազմիկ վերանորոգչական աշխատանքների, Թբիլիսիում, Վիրահայոց թեմի առաջնորդ հգշ. Տեր Կիրակոս վարդապետ Դավթյանի օրհնությամբ և հանդիսապետությամբ, 2021 թվականի հունիսի 25-ին, «Հայարտուն կենտրոնում կազմակերպվեց  նկարիչների և տիկնիկագործների աշխատանքների ցուցահանդես-վաճառք, որի հասույթը փոխանցվելու է տաճարի վերանորոգության հիմնադրամին: Ցուցադրվել էին վիրահայ  արվեստի գործիչների շուրջ երեք տասնյակից ավելի գործեր:

Վիրահայոց թեմի  առաջնորդը խոսելով 2020 թվականին Հայաստանին և Արցախին պատուհասած արքավիրքի, կրած ծանր օրերի և դժվարությունների մասին,  հորդորեց ներկաներին աջակցել արդեն մի քանի տարի շարունակվող Մայր Աթոռի Սուրբ տաճարի վերանորոգչական աշխատանքների իրականացմանը  և անպայման  ներդրում կատարել եկեղեցաշեն  այդ գործին:

Երկու օր շարունակվող ցուցահանդես-վաճառքի հասույթը և կատարված  նվիրատվությունները կփոխանցվեն «Սուրբ Էջմիածնի» բարեգործական հիմնադրամին:

Ցուցահանդես-վաճառքի կազմակերպչական խումբը, ի դեմս Ռուսթավի քաղաքի «Սբ. Գրիգոր Նարեկացի« հոգևոր, կրթամշակութային կենտրոնի և Ռուսթավիի հայության հոգևոր հովիվ արժանապատիվ Տեր Նարեկ քահանա Ղուշչյանի, երախտագիտություն հայտնեց «Հայարտուն կենտրոնի  ղեկավար Եվգենյա Մարկոսյանին, Մշակույթի բաժնի պատասխանատու Սուրեն Աբրամյանին,  դուդուկի խմբի ղեկավար Իվանե Մկրտչյանի, և իրենց  աշխատանքները նվիրած բոլոր նկարիչներին և տիկնիկագործներին բարեգործական նպատակով  այս գեղեցիկ գործողությունը  կյանքի կոչելու համար:

Կոնտակտ

5, Samghebro St., 0105 – Tbilisi, Georgia
Phone: +995322922248
Email: Այս էլ-փոստի հասցեն ծածկագրված է թափոնափոստի բոթերից։ Այն տեսնելու համար անհրաժեշտ է միացնել JavaScript։

 ©2021 Վիրահայոց թեմ. Բոլոր իրավունքները պաշտպանված են