Հայերեն 
ქართული 
English 
Русский 
Ճրագալույցի Սուրբ Պատարագ Վիրահայոց Թեմի եկեղեցիներում
2022 թվականի հունվարի 5-ի երեկոյան՝ Սուրբ Ծննդյան և Աստվածահայտնության նախատոնակին, Վիրահայոց թեմի գործող եկեղեցիներում մատուցվեց Ճրագալույցի Սուրբ Պատարագ:
Բազմամարդ էին Թբիլիսիի, Բաթումիի, Ջավախքի հայոց եկեղեցիները, հավատացյալները եկել էին առաջինը լսելու Տեր Հիսուս Քրիստոսի ծննդյան ավետիսը:
Թբիլիսիի Սուրբ Գևորգ առաջնորդանիստ եկեղեցում Ճրագալույցի Սբ. Պատարագին ներկա էին Թբիլիսիի Սակրեբուլոյի (Ժողովրդական ժողովի) նախագահ Գիորգի Տղեմալաձեն, Սակրեբուլոյի մեծամասնական պատգամավոր Կախա Լաբուչիձեն, մտավորականներ, թբիլիսահայ հասարակայնության անդամներ, հյուրեր: Մինչև Սբ. Պատարագի սկսվելը կատարվեց Երեկոյան ժամերգություն, ընթերցվեցին Սուրբ Գրքից հատվածներ:
Վիրահայոց թեմի առաջնորդ հգշ. Տեր Կիրակոս վրդ. Դավթյանի հանդիսապետությամբ, Ճրագալույցի Սուրբ և Անմահ Պատարագը մատուցեց արժանապատիվ Տեր Վիրապ քահանա Ղազարյանը:
Հընթացս Ս. Պատարագի պատարագիչ քահանան իր քարոզում անդրադարձ կատարեց Տիրոջ Ս. Ծննդյան խորհրդին, այն է՝Հիսուս Քրիստոսի Սուրբ Ծնունդը որպես պարգև մարդկությանը՝ մեղքերից ձերբազատվելու, մարդկանց ցավերն ամոքելու, նրանց համար հույս և ապավեն դառնալու, մարդկանց դեպի Երկնային թագավորություն առաջնորդելու համար:
Արժ. Տեր Վիրապը դիմելով ներկաներին, խնդրեց մեր Տեր Հիսուս Քրիստոսի Սուրբ Ծնունդը դիմավորել Աստծու Տանը, եկեղեցիներում և տաճարներում, և այնտեղ լսել Աստծու միածին որդու՝ ծննդյան ավետիսը: Պատարագիչ քահանան հորդորեց հավատացյալներին իրենց աղոթքներում խնդրել, որ Աստված Իր իմաստության Լույսը ծագեցնի նրանց հոգում, որպեսզի նրանց սիրտը դառնա բեթխեհեմյան այն մսուրը, որտեղից ճառագայթող Լույսը դառնա Սեր և բարություն, փառավորվի ամենքի կյանքում և հավատքի մեջ:
Հավարտ Ս. Պատարագի Վիրահայոց թեմի առաջնորդական տեղապահ հգշ. Տեր Կիրակոս վրդ. Դավթյանը ավետեց Հիսուս Քրիստոսի Սուրբ Ծնունդը և վառեց կենսատու մոմը, որը խորհրդանշում է Աստվածային լույս, եկեղեցու օրհնություն: Այդ լույսը առավել էր, քան Արեգակը, որը մոգերին առաջնորդեց դեպի ճշմարիտ Լույսը՝ դեպի Մանուկ Հիսուսը: Հիսուս Քրիստոսին խորհրդանշող լույսը բաշխվեց Ճրագալույցի Սուրբ Պատարագին ներկա հավատացյալներին: Նրանք եկեղեցում վառված ճրագներով իրենց հետ տուն տարան Սուրբ Ծննդյան ավետիսը և աստվածային լույսը:
Պատարագի արարողությունից հետո հոգևորականների թափորը շարժվեց դեպի Թեմակալ առաջնորդի նստավայր, որտեղ կատարվեց տնօրհնեքի կարգ:
Հայ Առաքելական Սուրբ եկեղեցին հինգ տաղավար տոներից երկուսի՝ Սուրբ Ծնունդին և Սուրբ Զատկին նախորդ օրերը կոչում է ճրագալույց: «Ճրագալույց» անունը ծագել է «ճրագ լուցանել» արտահայտությունից, որ նշանակում է ճրագ վառել, մոմ վառել:
