Материалы

Թբիլիսիի Սուրբ Գևորգ եկեղեցում բարձրացվեց էկումենիկ աղոթք

2022 թվականի հունվարի 21-ին  Վիրահայոց թեմի  առաջնորդանիստ  Թբիլիսիի  Սուրբ Գևորգ  եկեղեցում բարձրացվեց հերթական  էկումենիկ աղոթքը:  Աղոթքին ավանդաբար մասնակցում են Հայ Առաքելական Ուղղափառ Եկեղեցու Վիրահայոց թեմը, Լատինա-կաթոլիկների կովկասյան առաքելական վարչությունը, Վրաստանում Ավետարանական-լութերական եկեղեցին և Վրաստանի Ավետարանական-մկրտական  եկեղեցին:

Էկումենիկ աղոթքի ավանդույթը, մեկ անգամ ևս հաստատում է տարբեր երկրներում, այդ թվում նաև Վրաստանում,  առկա կրոնական համերաշխությունը: Մասնակից եկեղեցիները ամենամյա Էկումենիկ աղոթքը  հյուրընկալում են հերթականությամբ:

Կորոնավիրուսային համաճարակի պատճառով Վրաստանում գործող սահմանափակումները սակայն խոչընդոտ չհանդիսացան երկրի 4 քրիստոնեական դավանանքների մասնակցությամբ համատեղ միասնության աղոթք բարձրացնելուն: Այս տարվա էկումենիկ աղոթքի կազմակերպիչն էր Հայ Առաքելական Ուղղափառ Սուրբ Եկեղեցու Վիրահայոց թեմը՝  առաջնորդական տեղապահ հգշ. Տեր Կիրակոս վարդապետ Դավթյանի  օրհնությամբ, արժ. Տեր Նարեկ քահանա Ղուշչյանի կազմակերպմամբ և հոգևորականաց ու սարկավագաց դասի մասնակցությամբ:  

272299208 4836803979769709 4161925727067801178 N

Էկումենիկ աղոթքին ներկա էին Անդրկովկասի լատինական կաթոլիկների առաքելական վարչության առաջնորդ Գերաշնորհ Ջուզեպպե եպիսկոպոս Պազոտտոն, Վրաստանում Ավետարանական-մկրտական Եկեղեցու եպիսկոպոս Մալխազ Սոլղուլաշվիլին, Վրաստանում Ավետարանական-լութերական եկեղեցու փոխառաջնորդ  Իրեն  Սոլեյը,  հոգևոր սպասավորներ, հավատացյալներ:

Էկումենիկ աղոթքի արարողակարգը բացեց Վիրահայոց թեմի առաջնորդական տեղապահ հգշ. Տեր Կիրակոս վրդ. Դավթյանը: Ողջունելով  թեմական առաջնորդներին և իր օրհնությունը հղելով ներկաներին, Հայր Սուրբը բարձրաձայնեց  ընթացիկ տարվա  միասնության աղոթքի նշանաբանը, Մատթեոսից 2.2.  «Երբ արևելքում էինք, նրա աստղը տեսանք և եկել ենք խոնարհվելու նրա առաջ»։

Բոլոր մասնակիցները խոսեցին էկումենիկ աղոթքի կարևորության մասին նշելով, որ այսպիսի միջոցառումները կարող են մոտեցնել եկեղեցիների հավատացյալներին` պաշտելու միակ Աստծուն և Փրկչին` Հիսուս Քրիստոսին: Առաջնորդ  հոգևորականները շրջապատեցին սիրո և խաղաղության լույսով վառված  խորհրդանշական «Բեթղեհեմյան աստղը»,  միասին աղոթեցին Աստծու խոսքը լսելու, միասին լինելու և աշխարհում խաղաղություն հաստատելու, համաճարակային արհավիրքներից մարդկությանը փրկելու, տարհանվածներին և փախստականներին օգնության ձեռք մեկնելու խնդրանքով:

Էկումենիկ աղոթքն ավարտվեց առաջնորդների կողմից իրենց մայրենի լեզվով Տերունական  աղոթքով:Էկումենիկ աղոթքին  հոգևոր երգերի գեղեցիկ և հոգեհմա կատարումներով  մասնակցեց Սուրբ Գևորգ եկեղեցու  երգչախումբը՝ խմբավար Սվետլանա Տատոևայի գլխավորությամբ:

Էկումենիկ աղոթքի համաշխարհային ավանդույթը սկզբնավորվել է Եվրոպայում: 1910 թվականին Էդինբուրգում կայացած հանդիպման մասնակիցները համաձայնեցին, որ քրիստոնյաների միջև միասնությունը կամրապնդի առաքելական գործունեությունը և անմիջականորեն եկեղեցիները: Վրաստանում էկումենիկ աղոթքի նախաձեռնողներից մեկը Ավետարանական-Մկրտական եկեղեցին է և այն իրականացվում է արդեն 30 տարի: Այն ամեն տարի անցկացվում է հունվարի 18-ից հունվարի 25-ն ընկած ժամանակահատվածում:

269602215 4836804366436337 4695324873001504286 N

Կոնտակտ

5, Samghebro St., 0105 – Tbilisi, Georgia
Phone: +995322922248
Email: Այս էլ-փոստի հասցեն ծածկագրված է թափոնափոստի բոթերից։ Այն տեսնելու համար անհրաժեշտ է միացնել JavaScript։

 ©2022 Վիրահայոց թեմ. Բոլոր իրավունքները պաշտպանված են