Материалы

Խաչի փառաբանության տոնը Վիրահայոց թեմում

2022 թվականի սեպտեմբերի 11-ին Վիրահայոց թեմում նշվեց Հայ Առաքելական Սուրբ Եկեղեցու հինգ տաղավար տոներից վերջինը՝ Խաչվերացը կամ Խաչի փառաբանության տոնը: Այն  նշվեց  եկեղեցիներում մատուցված Սրբազան Պատարագով:

Թբիլիսիի Սուրբ Գևորգ առաջնորդանիստ եկեղեցում, Վիրահայոց թեմի առաջնորդ հգշ. Տեր Կիրակոս վրդ. Դավթյանի հանդիսապետությամբ, Սուրբ Պատարագ մատուցեց արժ. Տեր Հուսիկ քհն. Հարությունյանը:  Սուրբ Պատարագին մասնակցեց  Վրաստանում ՀՀ նորանշանակ դեսպան  Աշոտ Սմբատյանը՝ դեսպանության անձնակազմի ուղեկցությամբ:

Հընթացս Սբ. Պատարագի, պատարագիչ քահանան հավուր պատշաճի  քարոզ խոսեց  օրվա խորհրդի մասին, հավատացյալ բազմությանը մեկնաբանեց  գերությունից Տիրոջ խաչափայտի վերադարձի և Գողգոթայում կանգնեցման,  հավատքի կարևորության և Խաչի նշանակության մասին, պատգամելով  ներկաներին՝ ապրել հավատքով և քրիստոնեական պատվիրաններով:

3065287

Հավարտ Սբ. Պատարագի, Թեմակալ առաջնորդը  ներկաներին շնորհավորեց տաղավար տոնի կապակցությամբ և ներկայացրեց նորանշանակ դեսպանին՝ բարի գալուստ և արգասաբեր դիվանագիտական գործունեություն մաղթելով նրան՝ ի փառս երկու քրիստոնյա երկրների բարեկամության խորացման և զարգացման:

Արարողության ավարտից հետո Հոգեշնորհ Տ. Կիրակոս վարդապետը առանձնազրույց  ունեցավ դեսպան Սմբատյանի հետ:

Նույն օրը Թեմի եկեղեցիներում տեղի ունեցավ Սուրբ Խաչի վերացման փառաբանողական արարողություն: Հավարտ երեկոյան ժամերգության կատարվեց Սուրբ Խաչի թափոր: Տեղերում   հոգևոր դասի առաջնորդությամբ Խաչը պտտեցվեց Եկեղեցու չորս կողմերում և ժողովուրդը օրհնվեց վարդաջրով: Շարականների երգեցողությամբ  օրհնվեց ռեհանը, որը համարվում է խաչի ծաղիկ և  բաժանվեց հավատացյալներին:

Վերջում եկեղեցիների բակում տեղի ունեցավ հյուրասիրություն:

Երկուշաբթի առավոտյան Վիրահայոց թեմի եկեղեցիներում կմատուցվի հանգուցյալների հիշատակի Սբ. Պատարագ և կկատարվի  հոգեհանգստյան կարգ:

306354145

Կոնտակտ

5, Samghebro St., 0105 – Tbilisi, Georgia
Phone: +995322922248
Email: Այս էլ-փոստի հասցեն ծածկագրված է թափոնափոստի բոթերից։ Այն տեսնելու համար անհրաժեշտ է միացնել JavaScript։

 ©2022 Վիրահայոց թեմ. Բոլոր իրավունքները պաշտպանված են