Հայերեն 
ქართული 
English 
Русский 
Վերաօծվեց Կորխ գյուղի Սուրբ Ստեփանոս Եկեղեցին
Սույն թվականի հոկտեմբերի 29-ին Ախալքալաքի շրջանի Կորխ գյուղում, ձեռամբ Արմավիրի Թեմի Բարեխնամ Առաջնորդ Բարձրաշնորհ Տեր Սիոն արքեպիսկոպոս Ադամյանի ու մասնակցությամբ Վիրահայոց Թեմի Առաջնորդ Հոգեշնորհ Տեր Կիրակոս վարդապետ Դավթյանի, Սամցխե-Ջավախքի և Ծալկայի Ընդհանուր Առաջնորդական Փոխանորդ Հոգեշնորհ Տեր Նշան վարդապետ Հմայակյանի, Քվեմո Քարթլիի տարածաշրջանի հայկական համայնքերի հոգևոր հովիվ Հոգեշնորհ Տեր Զավեն վարդապետ Յազիչյանի, Ախալքալաքի Սուրբ Խաչ առաջնորդանիստ եկեղեցու հոգևոր հովիվ Արժանապատիվ Տեր Նարեկ քահանա Տիգրանյանի, Թբիլիսիի Սուրբ Գևորգ եկեղեցու հոգևոր հովիվ Արժանապատիվ Տեր Վիրապ քահանա Ղազարյանի, Էջմիածնի Սուրբ Աստվածածին եկեղեցու հոգևոր հովիվ Արժանապատիվ Տեր Մկրտիչ քահանա Մուշադյանի, տեղի ունեցավ Կորխ գյուղի նվիրյալ զավակների օժանդակությամբ վերականգնված Սուրբ Ստեփանոս եկեղեցու վերաօծման հանդիսավոր արարողությունը: Արարողությանը ներկա էին Վրաստանի խորհրդարանի պատգամավոր Սամվել Մանուկյանը, Ախալքալաքի շրջանային ժողովի նախագահ Նաիրի Իրիցյանը, Ախալքալաքի քաղաքապետ Մելքոն Մակարյանը և բազմաթիվ հյուրեր: Կորխում հոգևոր հայրերին դիմավորեցին ավանդական աղ ու հացով: Բարձրաշնորհ Սիոն Սրբազանը ողջունեց ներկաներին և շնորհավորեց եկեղեցու վերաբացման կապակցությամբ: Այնուհետև տեղի ունեցավ դռնբացեքի արարողությունը, որին հաջորդեց եկեղեցու օծման կարգը: Արարողության ընթացքում Արժանապատիվ Տեր Նարեկ քահանա Տիգրանյանն ու Արժանապատիվ Տեր Վիրապ քահանա Ղազարյանը ջրով ու գինով լվացին եկեղեցու Սուրբ Սեղանը, 16 սյուները և մկրտության ավազանը: Ապա Բարձրաշնորհ Տեր Սիոն արքեպիսկոպոս Ադամյանը Սրբալույս Մյուռոնով կատարեց եկեղեցու օծումը: Այնուհետև կատարվեց մատաղի օրհնություն: Տոնական օրն ավարտվեց ժողովրդական տոնահանդեսով:
