Հայերեն 
ქართული 
English 
Русский 
ՀՀ ԿԳՄՍ նախարարության պատվիրակության անդամների այցը Թբիլիսիի Սբ.Էջմիածին եկեղեցի
2023 թվականի մարտի 10-ին, պաշտոնական այցով Վրաստանում գտնվող ՀՀ կրթության, գիտության, մշակույթի և սպորտի նախարար Ժաննա Անդրեասյանի գլխավորած պատվիրակությունը այցելեց Վիրահայոց թեմի Թբիլիսիի Սբ. Էջմիածին եկեղեցի: Բարձրաստիճան հյուրերին դիմավորեցին Վիրահայոց թեմի առաջնորդ հգշ. Տեր Կիրակոս վրդ. Դավթյանը, հոգևորականաց դասը, աշխարհիկ անձնակազմը: Պատվիրակության կազմում էին ՀՀ ԿԳՄՍ նախարարի տեղակալ Արթուր Մարտիրոսյանը, ԵՊՀ ռեկտոր Հովհաննես Հովհաննիսյանը, ԿԳՄՍն արտաքին կապերի և սփյուռքի վարչության պետ Մարիամ Գիգոյանը և ուրիշներ: Հյուրերի հետ էր Վրաստանում ՀՀ արտակարգ և լիազոր դեսպան Աշոտ Սմբատյանը:
Մայր հայրենիքի կրթության ոլորտի ղեկավարները եկեղեցում մոմեր վառելուց և Սուրբ տաճարի պատմությանը թեմակալ առաջնորդի կողմից իրազեկվելուց հետո, դիտեցին բակում վեր խոյացած հայ-վրացական բարեկամության խաչքարը, այստեղ հանգրվանած հուշարձանային քարե մասունքները և բարերար Ալեքսանդր Մանթաշյանցի հուշարձանը:
Այնուհետև պատվիրակության անդամները տեղափոխվեցին «Հայարտուն» կենտրոն, որտեղ կենտրոնի «Ներսես Շնորհալի» մանկա-պատանեկան երգչախումբը (խմբավար՝ Մ. Աբուլյան, դաշնակահար՝ Կարեն Միրզոյան) հյուրերին ողջունեց ՀՀ և Վրաստանի պետական օրհներգների կատարմամբ:
«Հայարտուն» կենտրոնի տնօրեն Եվգենյա Մարկոսյանը ներկայացրեց կենտրոնի կրթամշակութային գործունեությունը, կարևորելով աճող սերնդի հայեցի դաստիարակության և հայրենիքի հետ կրթական-մշակութային կապերի խորացման ուղենիշ հանդիսացող հայոց լեզվի, մշակույթի, ավանդույթների պահպանումը:
Տիկին նախարարը անթաքույց գոհունակությամբ արժևորեց կենտրոնի գործունեությունը, խոստացավ ՀՀ ԿԳՄՍ նախարարության կողմից կյանքի կոչվող տարբեր կրթական նախագծերում (ուսուցիչների վերապատրաստում, դպրոցականների և երիտասարդության շրջանում տարբեր մշակութային և մարզական փառատոներ և մրցույթներ) ընդգրկել վիրահայության ներուժը, ինչը կնպաստի աճող սերնդի մոտ ազգային հպարտության, հայրենիքին նվիրվածության ամրապնդմանն ու խորացմանը:
