Հայերեն 
ქართული 
English 
Русский 
«Բարի սամարացի» ընկերության նվերների անակնկալը ապրեցին նաև «Վրաստանի հայ համայնք» կազմակերպության սաները
2023 թվականի հունիսի 17-ին «Վրաստանի հայ համայնք» հասարական կազմակերպության (նախագահ՝ Արթուր Միրզոյան) գրասենյակ այցելեց Վիրահայոց թեմի առաջնորդ հգշ. Տեր Կիրակոս վարդապետ Դավթյանը՝ բարեշնորհ սարկավագ Գևորգ Ավետիսյանի ուղեկցությամբ:
Հգշ. Հայր Սուրբը ծանոթացավ վերոնշյալ կազմակերպության գործունեությանը, այստեղ գործող հայերենի ուսուցման, երգի-պարի, վրացերենի, Հ.Մ.Ը.Մ (Հայկական մարմնամարզական ընդհանուր միություն) Թբիլիսիի մասնաճյուղի և մյուս ստեղծագործական խմբակների աշխատանքներին, արժևորեց կազմակերպության ղեկավարների և հաճախող սաների ակտիվ մասնակցությունը Վիրահայոց թեմի եկեղեցիներում մատուցվող Սուրբ Պատարագներին և եկեղեցական ծիսական արարողություններին, հորդորեց գործունեությունը շարունակել լայնածավալ և երեխաներին ծանոթացնել նաև քրիստոնեական հավատքի պատվիրաններին, թերթել Հայոց Եկեղեցու պատմությունը:
Վիրահայոց թեմի առաջնորդը տարբեր խմբակների սաներին և Հ.Մ.Ը.Մ սկաուտական շարժման մասնակիցներին բաշխեց իր հայրական օրհնությունը և բաժանեց «Բարի սամարացի» քրիստոնեական բարեգործական ընկերության նվերները: Տարբեր հասակի սաները ապրեցին այն ուրախությունը, որը նրանց պարգևեցին հետաքրքրություններով և գեղեցիկ անակնկալներով լի տուփերը:
