Հայերեն 
ქართული 
English 
Русский 
Հանդիպում համահայկական գրողների միության ներկայացուցիչների հետ
2023 թվականի սեպտեմբերի 15-ին, Վիրահայոց թեմի «Հայարտուն» կենտրոնը հյուրընկալեց Համայկական գրողների միության նախագահ, գրականագետ, բանասիրական գիտությունների թեկնածու Աբգար Ափինյանին, «Հայրենիքի ձայն» համայկական գրողների միության մշակութային ամսաթերթի խմբագիր Սուսաննա Ղազարյանին և միության անդամ Տարոն Գլակին:
«Հայարտուն» կենտրոնի ղեկավար Եվգենյա Մարկոսյանի ողջույնի խոսքից և հյուրերին ներկայացնելուց հետո, գրականագետ Աբգար Ափինյանը, անդրադարձ կատարելով հայ գրականության մատենագրությանը, իր բանախոսության առանցք դարձրեց հայ գրականության զարգացման արդի շրջանը: Բանասիրական գիտությունների թեկնածուն կարևորեց գրական անդաստանում տիրող իրավիճակը, որը թեև հագեցած է ստեղծագործող անհատների բանաստեղծական և արձակ խոսքով, սակայն սակավաթիվ է դարձել գրականագետներով, գրականությունը քննադատաբար ընկալող, ստեղծագործողին ուղղորդող դեմքերով, որոնց վերլուծությունը, ճշմարիտ և շտկող խոսքը այնքան անհրաժեշտ, զարգացնող և ոգևորիչ է ստեղծագործողի համար:
Հանդիպման ուղենիշը համայն հայության ստեղծագործական մտքի համախմբումն էր, միասնության գաղափարը, որը, անշուշտ, հայ գրականության արդի փուլում երիտասարդ ստեղծագործողին ոգեշնչող է, ճանաչում և ժողովրդականություն բերող, նրա գործերի տարածման երաշխիքը:
Հանդիպումն անսովոր էր և հետաքրքիր, կենդանի հարց ու պատասխանի ձևաչափով, համեմված հայ գրականության ռահվիրաների արձակ գործերից մեջբերումներով և պոեզիայի նմուշների ասմունքով:
