Материалы

Սուրբ Գևորգ զորավարի տոնը նշվեց Վիրահայոց թեմի առաջնորդանիստ եկեղեցում

Սուրբ Գևորգ զորավարի տոնը վիրահայ հավատացյալի նվիրական տոներից մեկն է, որը  2023 թվականին նշվեց սեպտեմբերի 30-ին:

Վիրահայոց թեմի Թբիլիսիի Սուրբ Գևորգ առաջնորդանիստ եկեղեցում, Թեմակալ առաջնորդ Հգշ. Տեր Կիրակոս վրդ. Դավթյանի հանդիսապետությամբ Սբ. Պատարագ մատուցեց արժ. Տեր Վիրապ քհն. Ղազարյանը: Օրը թեև տոնական էր, բայց զգացվում էր համընդհանուր թախիծն ու ցավը Արցախում և Մայր Հայաստանում տիրող իրավիճակի կապակցությամբ:  Հավատացյալները  եկել էին աղոթելու այս զորավոր տաճարում, ստանալու քաջամարտիկ Սուրբ Գևորգի օրհնությունն ու շնորհները և  տխրությունը փարատելու հույս ու հավատ:   

Հընթացս Սուրբ Պատարագի, Պատարագիչ-քահանան քարոզ խոսեց օրվա խորհրդի՝ քաջամարտիկ զորավարի քրիստոնյա հավատքին նվիրվածության և նահատակության մասին, արժևորեց հավատացյալների  սերն ու նվիրվածությունը Սրբին, որի անունով դարերի ընթացքում կառուցվել են եկեղեցիներ, ընդորում առաջնորդանիստ Սուրբ Գևորգը:

385729499 718290607008788 4758843187843449362 N

Հոգևոր հայրը զորավար Գևորգի անսասանությունը քրիստոնեական  հավատքի նկատմամբ  համեմատեց հայ ժողովրդի հետ, ով պատմության ընթացքում բազում փորձությունների միջով է անցել, կենաց և մահու պայքար մղել և հավատարիմ մնացել իր հավատքին: Պատարագիչ քահանան անդրադարձ կատարելով օրհասական օրեր ապրող մեր ժողովրդին, հորդորեց լինել միասնական, պահել մեր հոգևոր ու մշակութային արժեքները, լցվել հայրենասիրությամբ ու նվիրական ոգով դեպի մեր Մայր Հայրենիքն ու Վրաստան աշխարհը:  

Հավարտ Սբ. Պատարագի Վիրահայոց թեմի առաջնորդ Հգշ. Տեր Կիրակոս վրդ. Դավթյանը բոլոր Գևորգ անվանակիրներին շնորհավորեց տոնի կապակցությամբ, հորդորեց նրանց ապրել Քրիստոսի հավատարիմ զավակները լինելու հպարտությամբ:

385752396 718290543675461 8680647464453578106 N

Հոգևոր հայրերի կողմից օրհնվեց և ներկաներին բաժանվեց Սուրբ Գևորգի տոնի առիթով հավատացյալների կողմից արված մատաղը:  Տեղի ունեցավ նաև հյուրասիրություն:

Սուրբ Գևորգ զորավարի տոնը հավուր պատշաճի նշվեց Վիրահայոց թեմի մյուս եկեղեցիներում, հատկապես Սրբի անունով եկեղեցիներում:

Հավելենք, որ Սուրբ Գևորգ տաճարը Թբիլիսիի հնագույն եկեղեցիներից է, այն կառուցվել է 13-րդ դարում, եղել է հայկական միջնադարյան հոգևոր, մշակութային և լուսավորչական կենտրոններից մեկը: 2015 թվականին հիմնովին վերանորոգվելով IDeA հիմնադրամի, Ռուբեն Վարդանյանի  և այլ բարերարների միջոցներով, Սուրբ Գևորգ եկեղեցին (կամ Բերդի Մեծ եկեղեցին) շարունակում է  իր շուրջը համախմբել վիրահայությանը, հանդիսանալով թեմի առաջնորդանիստը:

385693716 718290557008793 1898419234624891514 N

Կոնտակտ

5, Samghebro St., 0105 – Tbilisi, Georgia
Phone: +995322724111
Email: Այս էլ-փոստի հասցեն ծածկագրված է թափոնափոստի բոթերից։ Այն տեսնելու համար անհրաժեշտ է միացնել JavaScript։

 ©2023 Վիրահայոց թեմ. Բոլոր իրավունքները պաշտպանված են