«Փոքր քայլ» միջազգային երաժշտական փառատոնի շնորհանդեսը և Վիրահայոց թեմի «Հայոս բենդ» վոկալ-գործիքային համույթի համերգը

2024 թվականի ապրիլի 13-ին  Վիրահայոց թեմի «Հայարտուն» կրթամշակութային և երիտասարդության կենտրոնում  հյուրընկալվեցին ՀՀ Էջմիածին քաղաքից ժամանած «Փոքր քայլ» միջազգային երաժշտական փառատոնի կազմակերպիչները: Այցի նպատակն էր  շնորհանդեսի  միջոցով վրաց երաժշտական կազմակերպություններին  իրազեկել ընթացիկ տարվա հունիս ամսին ՀՀ Էջմածին քաղաքում կայանալիք երաժշտական փառատոնի մասին:  Շնորհանդեսին ներկա էր Վրաստանում ՀՀ դեսպանության  մշակույթի հարցերով խորհրդական  Դավիթ  Տեր-Մկրտչյանը:

Փառատոնի համահիմնադիրներ   Արտյոմ Հարությունյանը, Արթուր Գազարյանը և  Վարդան Թորոսյանը մանրամասն ներկայացրին փառատոնի նպատակը, մասնակցության պայմանները և Վրաստանի երաժշտական մշակույթը Հայաստանում  ներկայացնելու բարի կամքը:  Ըստ համահիմնադիրների և կազմակերպչական խմբի անդամների,  փառատոնը անց է կացվում արդեն երկրորդ տարին՝ ՀՀ ԿԳՄՍ նախարարության  հովանու ներքո և Էջմիածնի քաղաքապետարանի աջակցությամբ: Արդեն մասնակցության հայտ են ներկայացրել հազար 800-ից ավելի  ցանկացողներ:Հյուրերը իրենց շնորհակալությունը հայտնեցին Վրաստանում ՀՀ արտակարգ և լիազոր դեսպան պ-ն Աշոտ Սմբատյանին, Վիրահայոց թեմի առաջնորդ Գրշ. Տեր Կիրակոս եպս. Դավթյանին և «Հայարտուն» կենտրոնի  ղեկավար Եվգենյա Մարկոսյանին աջակցության և հյուրընկալության համար: 

Շնորհանդեսին ներկա Թբիլիսիի Արամ Խաչատրյանի անվան թիվ  10 երաժշտական դպրոցից Աննա Տաբատաձեն, Ալոյե Միզանդարիի անվան թիվ 1 դպրոցից Թինաթին Ցագարելին, Եվգենի Միքելաձեի անվան  կենտրոնական երաժշտական  կազմակերպությունից Գիորգի Կորձաձեն և մյուսները, անդրադարձ կատարելով  տարիներ առաջ հայ-վրացական երաժշտական բնագավառների միջև բարեկամական հարաբերություններին և  համագործակցությանը,  արժևորեցին նման միջոցառումները վերստին  կյանքի կոչելու  անհրաժեշտությունը և բարձրաձայնեցին իրենց պատրաստակամությունը այդ հարաբերություններին մասնակից դառնալու,  զարգացմանը և  խորացմանը  օժանդակելու մասին:

Շնորհանդեսը շարունակվեց  Վիրահայոց թեմի «Հայարտուն» կենտրոնի «Հայոս բենդ» վոկալ-գործիքային համույթի գողտրիկ  համերգով,  որը իր գեղեցիկ, բազմալեզու և կատարողական բարձր մակարդակով արժանացավ  ներկաների բուռն ծափահարություններին և ընդունելությանը:  Հիշեցնենք, որ գնահատելի էին  համույթի գեղարվեստական ղեկավար Վլադիմիր Ասատուրովի  աշխատանքը,  մենակատարներ Լիզա Ակոպովայի, Սոֆյա Օգանեզյանի,  տարբեր նվագարանների վրա  Կարո Սամվելյանի, Արման Պապիկյանի, Ալեքս  և Անրի  Ակոպյանների   կատարումները: