Գերմանիայի Ավետարանական-Լյութերական եկեղեցու պատվիրակությունն այցելեց Վիրահայոց թեմի Թբիլիսիի Սբ. Գևորգ առաջնորդանիստ եկեղեցի

2024 թվականի ապրիլի 29-ին,   Վրաստանում և  Հարավային Կովկասում Ավետարանական-Լյութերական եկեղեցու  առաջնորդ եպիսկոպոս  Ռոլֆ Բարայսի  գլխավորությամբ և Վրաստանում ՀՀ արտակարգ և լիազոր դեսպան Աշոտ Սմբատյանի հրավերով և  նախաձեռնությամբ,  Վիրահայոց թեմի Սուրբ Գևորգ առաջնորդանիստ եկեղեցի այցելեց  Գերմանիայի տարբեր քաղաքներում գործող  լյութերանական  եկեղեցիների  ղեկավարների  պատվիրակությունը:

 Հյուրերին ընդունեց Վիրահայոց թեմի առաջնորդ Գերաշնորհ Տեր Կիրակոս եպիսկոպոս Դավթյանը: Կայացած զրույցի ընթացքում Վիրահայոց թեմի առաջնորդը հյուրերին ներկայացրեց   Հայաստանյայց Առաքելական Սուրբ Եկեղեցում գործող հայոց դարավոր թեմը, նրա գործունեությունը, խոսեց թեմի  ստեղծման պատմության,  պատմական և նորաշեն եկեղեցիների,  հոգևոր, մշակութային, դաստիարակչական  ուղղությամբ տարվող աշխատանքների մասին: Անդրադարձ կատարվեց նաև  քույր Եկեղեցիների, ընդորում Վրաստանի Ավետարանական-Լյութերական Եկեղեցու հետ  համագործակցությանը: Կողմերը հույս հայտնեցին  եկեղեցիների միջև բարի դրացիական հարաբերությունները շարունակելու և խորացնելու   մասին:

 Հյուրերը շրջայց կատարեցին  առաջնորդանիստ Սբ. Գևորգ եկեղեցում, հիացմունքով  դիտեցին  հինավուրց եկեղեցու գեղեցկությունը, պատերը զարդարող հնամենի զարդանկարները: