«Լույսեր” վավերագրական ֆիլմի ցուցադրում «Հայարտուն» կենտրոնում

2024 թվականի մայիսի 8-ին,  Վիրահայոց թեմի առաջնորդ Գրշ. Տեր Կիրակոս եպս, Դավթյանի օրհնությամբ, թեմի «Հայարտուն» կենտրոնում տեղի ունեցավ «Լույսեր» վավերագրական ֆիլմի ցուցադրումը:

Բարեշնորհ Գևորգ սարկավագ  Ավետիսյանը ողջունելով ներկաներին տեղեկացրեց, որ «Լույսեր» վավերագրական ֆիլմը 44–օրյա պատերազմի ժամանակ կամավորական աշխատանքներ կատարած դեռահասների և պատերազմի հետևանքով հարազատ բնակավայրը կորցրած երեխաների մասին է։ Ներկայացրեց ֆիլմի  ռեժիսոր, սցենարիստ  Շողեր Պետրոսյանին և բեմադրող օպերատոր, պրոդյուսեր  Վազգեն Մարտիրոսյանին, ովքեր Երևանից ժամանել էին  հատուկ ցուցադրությանը ներկա գտնվելու նպատակով:

Իրենց ելույթներում հյուրերը  խոսեցին ֆիլմի նպատակի մասին, կարևորելով պատերազմի արհավիրքների դեմ պայքարի դեռահասների  յուրօրինակ մոտեցումը, պատերազմից տուժած, տուն ու տեղ կորցրած մարդկանց իրենց գործողություններով օգնելու պատրաստակամությունը և այդ մասին հասարակությանը իրազեկելու դաստիարակչական նշանակությունը:

Ֆիլմի նախաբանում տրված էր այդ երեխաների ուղերձը թբիլիսահայությանը, ինչը նաև պատերազմական բոլոր տեսակի գործողությունների յուրատեսակ դատապարտում էր:

Ֆիլմի ավարտին հանդիսատեսն իր տպավորություններով կիսվեց  հեղինակների հետ, ստացավ իրեն հետաքրքրող հարցերի պատասխանները:

Վերջում  Գևորգ սարկավագը փոխանցեց Վիրահայոց թեմի առաջնորդի հայրական օրհնությունը և  բարեմաղթանքները և  շնորհակալություն հայտնեց ֆիլմի հեղինակներին  Թբիլիսիոսւմ ֆիլմի դիտումը նախաձեռնելու համար: