Հայերեն 
ქართული 
English 
Русский 
Վիրահայոց Թեմում նշվեց Սբ.Աստվածամոր Վերափոխման տոնը
2024 թվականի օգոստոսի 18-ին Հայ Առաքելական Սուրբ Եկեղեցին նշեց Սբ. Աստվածամոր Վերափոխման տոնը: Այն հինգ տաղավար տոներից չորրորդն է և Տիրամորը նվիրված ամենահին տոնը: Աստվածամոր տոնը Վիրահայոց թեմի բոլոր եկեղեցիներում նշանավորվեց Սբ. Պատարագներով և խաղողօրհնության կարգով:
Թբիլիսիում Առաջնորդանիստ Սբ. Գևորգ եկեղեցում, Թեմակալ առաջնորդ Գրշ. Տեր Կիրակոս եպիսկոպոս Դավթյանի հանդիսապետությամբ, տոնական Սուրբ Պատարագ մատուցեց արժանապատիվ Տեր Հուսիկ քահանա Հարությունյանը: Սբ. Պատարագին ներկա էին թբիլիսահայ հասարակայնության ներկայացուցիչներ, մտավորականներ, կառույցների ղեկավարներ, բազում հավատացյալներ և զբոսաշրջիկներ:
Սուրբ Պատարագի ավարտին, Գրշ. Տեր Կիրակոս եպիսկոպոսը հավուր պատշաճի քարոզ խոսեց օրվա խորհրդի՝ Տիրամոր մեծ Առաքելության, նրա ննջման և Հարության, Վերափոխման մասին, անդրադարձ կատարեց խաղաղօրհնության խորհրդին: Այնուհետև Թեմակալ առաջնորդի հանդիսապետությամբ, կատարվեց «Խաղողօրհնեքի» հանդիսավոր արարողությունը, բարձրացվեց Ս. Ներսես Շնորհալու «Խաղողի օրհնության» աղոթքը:
