Վիրահայոց թեմի ներկայացուցիչները մասնակցեցին Վրաստանում գործող կրոնական դավանանքների աշխատանքային հանդիպմանը

2024 թվականի սեպտեմբերի 30-ից առ հոկտեմբերի 3-ը «Լազարե» հիմնադրամի  նախաձեռնությամբ, «Երիտասարդները Հարավային Կովկասում խաղաղության համար» նախագծի շրջանակներում, Քոբուլեթիում,  Պատրիարքության Բոբողվաթի նստավայրում կայացավ Վրաստանում գործող կրոնական դավանանքների ներկայացուցիչների աշխատանքային հանդիպումը: Վիրահայոց առաջնորդի օրհնությամբ,  թեմը ներկայացնում էին արժ. Տեր Կիրակոս քահանա Սիմոնյանը և բարեշնորհ  Գևորգ սարկավագ Ավետիսյանը:

Նախագիծն  իրականացվում է 2007 թվականից և ընթացիկ 2022-2026 թվականների փուլի նպատակն է աջակցել խաղաղության կառուցմանը  Հարավային Կովկասի տարածաշրջանում:

2022 թվականից նախագծում ներգրավված են Վրաց Ուղղափառ Եկեղեցու, Հայ Առաքելական  Սուրբ Եկեղեցու Վիրահայոց թեմը և Վրաստանի մահմեդական համայնքի ներկայացուցիչները, ովքեր հանդիպում և քննարկում են երկրում և տարածաշրջանում առկա իրավիճակը, հակամարտությունների վերափոխման և խաղաղության կառուցման պայմանները, կրոնի և հոգևորականության դերի մասին, ցույց են տալիս համագործակցության ուղիները և համայնքում հնարավոր միջամտության հնարավորությունները։