Համբարձման տոնը Թբիլիսիում նշվեց Սուրբ Պատարագով

2025 թվականի մայիսի 29-ին,  Քրիստոնեական Սուրբ Եկեղեցին  նշեց  Հարությունից հետո Քրիստոսի 40 օր երկրի վրա  մնալու և  դեպի երկինք հրաշափառ Համբարձման տոնը:  Հայ Առաքելական  Սուրբ Եկեղեցու համար տոնը երկակի նշանակություն ունի, քանզի Համբարձման տոնի հետ միասին Հայոց Եկեղեցին նշում է 1441 թվականին Հայոց Հայրապետական Աթոռը՝ Սսից Վաղարշապատ փոխադրության հիշատակը:

Տոնը Վիրահայոց թեմի եկեղեցիներում նշվեց  Սուրբ և Անմահ Պատարագներով և ուխտագնացություններով:

Թբիլիսիի Սուրբ Էջմիածին եկեղեցում, Վիրահայոց թեմի առաջնորդ Գրշ. Տեր Կիրակոս եպս. Դավթյանի օրհնությամբ, Սուրբ Պատարագ մատուցեց արժանապաիվ Տեր Սամվել քահանա Թորոսյանը:  Համբարձման տոնին, ի թիվս մյուս հավատացյալների, ներկա էին ծաղկեպսակներով զուգված Թեմի «Սբ. Մովսես Խորենացի» նախակրթարանի սաները՝  դաստիարակների և ծնողների հետ:

Հընթացս Սուրբ Պատարագի Պատարագիչ քահանան  քարոզ խոսեց Համբարձման տոնի խորհրդի և Սուրբ Էջմիածնի ուխտի օր հռչակելու մասին: Կատարվեց «Հայրապետական» մաղթանք, որի ժամանակ աղոթք բարձրացվեց Մայր Աթոռ Սուրբ Էջմիածնի անսասանության և հավերժության, ինչպես նաև Ամենայն Հայոց կաթողիկոսի արևշատության և անխռով գահակալության համար:

Սուրբ Պատարագի վերջում նախակրթարանի սաները եկեղեցու մերձակա տարածքում ծաղկեփնջեր հյուսեցին,  և ի նշան տոնի ժողովրդական ավանդույթի,  ծաղեպսակները նվիրեցին անցորդներին: