Տարեվերջի միջոցառումը՝ Ամանորյա տոնահանդես

Վիրահայոց թեմի «Հայարտուն» կենտրոնի Գալուստ Գյուլբենկյան սրահում  2025 թվականի  դեկտեմբերի 26-ին կայացավ Թեմի «Սուրբ Մովսես Խորենացի» նախակրթարանի ամանորյա տոնահանդեսը: Նախակրթարանի ուսուցիչների և ծնողների ջանքերով ու երևակայությամբ զարդարված դահլիճը իսկական ձմեռային տեսք էր ստացել, որտեղ կենդանիներ և եղևնիներ հիշեցնող  շորերով  պճնված  նախակրթարանի  սաները սպասում էին Ձմեռ պապին, ով գալու էր նվերներով և ավետելու էր նոր՝ 2026 թվականի մեկնարկը: Բայց մինչ այդ նրանք պետք է իրենց ելույթներով և գեղեցիկ խաղով  արժանանային  Ձմեռ պապի գովեստին:

Տոնականորեն զարդարված դահլիճում տեղեր էին զբաղեցրել արժանապատիվ Տեր Կիրակոս քահանա Սիմոնյանը և արժ. Տեր Հովսեփ քահանա Հարությունյանը,  Թեմի  աշխատակիցները,  փոքրիկների ծնողները, տատիկներն ու պապիկները:

Տերունական աղոթքից հետո Վիրահայոց թեմի կրթության բաժնի ղեկավար և «Հայարտուն» կենտրոնի տնօրեն Եվգենյա Մարկոսյանը փոխանցեց թեմի առաջնորդ Գրշ. Տեր Կիրակոս եպս. Դավթյանի օրհնությունը և բարեմաղթանքները, կարևորեց Թեմակալ առաջնորդի ուշադրությունն ու հոգացությունը  նախակրթարանի և  սաների նկատմամբ, գնահատանքի խոսքեր ուղղեց բոլոր այն ծնողներին,  ովքեր ընտրել են հայոց մանկապարտեզն ու երեխաների հայեցի դաստիարակությունը:

Ու հաջորդեցին միմյանց փոքրիկների հայերեն խոսքը, ուրախ երգն ու պարը, ասմունքը, հանելուկները: Երեխաների ճիշտ վարվելակերպը, վարժ արտասանությունը, գեղեցիկ երգն ու պարը դարձան այն բանի վկայությունը, որ նախակրթարանն իր գործունեության մեջ ընտրել է զարգացման ճիշտ ուղի:

Տպավորիչ էր փոքրիկների մասնակցությամբ  «Պալատիկ» հեքիաթի բեմականացումը: Տարբեր կենդանիների կերպարանքով ու խաղով  այն ընկերասիրության, բարեկամության, ուրախ տրամադրությամբ ամանորը դիմավորելու գեղեցիկ դրվագ:

Փոքրիկների  ելույթներից  գոհունակությունը չթաքցրեց անակնկալ  ներկայացած Ձմեռ պապը, ով քաջալերելով  երեխաների հիանալի  դերակատարությունն ու  ելույթները,  նրանց ուրախացրեց ամանորյա  նվերներով:

Վիրահայոց թեմի «Սբ. Մովսես Խորենացի» նախակրթարանի ուսուցչական կազմը, ծնողները և սաները  տոնական տրամադրությամբ  հրաժեշտ տվեցին անցնող  2025 թվականին, նոր՝ 2026 թվականը գոտեպնդված, նոր եռանդով և բարձր տրամադրությամբ դիմավորելու  ակնկալիքով: