Վարագա Սբ. Խաչին նվիրված Սուրբ Պատարագ և հոգեհանգստյան կարգ՝ 44-օրյա պատերազմի զոհերի հիշատակին

Քրիստոնեական աշխարհը նշում է Սուրբ խաչին նվիրված չորս տոն, որոնցից չորրորդը՝ Վարագա Խաչի տոնը ազգային է, զուտ հայկական և նշում է միայն Հայոց եկեղեցին:

2022 թվականի սեպտեմբերի 25-ին, Վիրահայոց թեմի գործող եկեղեցիներում մատուցվեց Վարագա Սբ. խաչի տոնին նվիրված Սուրբ Պատարագ:

Թբիլիսիի առաջնորդանիստ Սուրբ Գևորգ եկեղեցում տոնական Սբ. Պատարագ մատուցեց արժանապատիվ Տեր Վիրապ քահանա Ղազարյանը: Պատարագիչ քահանան անդրադարձ կատարեց Վարագա Սուրբ խաչի նշանի խորհրդին, նշեց, որ խաչը հայտնվել 7-րդ դարում, երբ հայ ժողովուրդը մահու և կենաց պայքար էր մղում արաբական հրոսակների դեմ: Խաչը այդ օրհասական ժամանակներում հայտնվել է որպես փրկության նշան: Տեր Վիրապը հորդորեց ներկաներին՝ խոնարհվել խաչի առջև և ապավինել նրա զորությանը:

Հավարտ Սբ.Պատարագի Թբիլիսիի գործող երկու եկեղեցինրում՝ Սուրբ Գևորգ առաջնորդանիստ և Հավլաբարի Սուրբ Էջմիածին եկեղեցիներում, Վիրահայոց թեմի առաջնորդ հգշ. Տեր Կիրակոս վրդ. Դավթյանի օրհնությամբ, հոգևոր դասի և սարկավագների մասնակցությամբ կատարվեց հոգեհանգստյան կարգ՝ 2020 թվականի սեպտեմբերի 27-ին Ադրբեջանի կողմից սանձազերծած 44-օրյա պատերազմի զոհերի հոգիների խաղաղության համար: Եկեղեցիներում մոմեր վառվեցին և խնկաբույր տարածվեց հայրենիքի և Արցախի պաշտպանության համար ընկած զինվորների հիշատակին: