Հոգեհանգստյան կարգ և ծաղիկների խոնարհում Ապրիլի 9-ի նահատակների հիշատակին

Վրաստանի բազմազգ ժողովուրդը  ամեն տարվա ապրիլի 9-ին  իր խոնարհումն է բերում 1989 թվականի  այդ օրը  Թբիլիսիում ԽՍՀՄ պաշտպանության նախարարության զորքերի կողմից բազմահազարանոց խաղաղ հանրահավաքի ցրման զոհերի հիշատակին: 

Վրաստանում ապրիլի 9-ը  նշվում է որպես ազգային միասնության, քաղաքացիական համաձայնության և հայրենիքի համար զոհվածների հիշատակի օր:

2025 թվականի ապրիլի 9-ին, Վիրահայոց թեմի առաջնորդ Գրշ. Տեր Կիրակոս եպս.  Դավթյանի  օրհնությամբ, թբիլիսահայ համայնքի ներկայացուցիչների և «Վրաստանի հայ համայնք» հասարակական կազմակերպության անդամների մասնակցությամբ, Թբիլիսիի Հավլաբարի Սուրբ Էջմիածին եկեղեցուն կից Երևանյան պուրակում Վրաստանի անկախության համար զոհվածների հիշատակին կանգնեցված խաչքարի մոտ կատարվեց հոգեհանգստյան կարգ զոհերի հոգիների խաղաղության համար:

Արժ. Տեր Սամվել քահանա Թորոսյանը  հոգևոր ծառայողների մասնակցությամբ  աղոթք բարձրացրին ի հիշատակ 21 անմեղ զոհերի, որոնց մեծ մասը կանայք էին:  Ներկաները հարգանքի տուրք մատուցեցին  և ծաղիկներ խոնարհեցին ու ծաղկեպսակ տեղադրեցին խաչքարի պատվանդանին: