Հայերեն 
ქართული 
English 
Русский 
Առնո Բաբաջանյանի հիշատակի երեկոն «Հովհ. Թումանյանի տուն» կենտրոնում
2025 թվականի հունվարի 25-ին Թբիլիսիում, Վիրահայոց թեմի «Հովհ. Թումանյանի տուն» գիտա-մշակութային կենտրոնում, կայացավ մեծատաղանդ երաժիշտ-երգահան Առնո Բաբաջանյանի հուշ- երեկոն:
Միջոցառմանը իր օրհնաբեր ներկայությունն էր բերել Վիրահայոց թեմի առաջնորդ Գրշ. Տեր Կիրակոս եպս. Դավթյանը: Իսկ պատվավոր հյուրերն էին հայ և վրացի երաժշտասեր հասարակայության ներկայացուցիչներ, երգահանի որդին՝ Արայիկ Բաբաջանյանը: Կենտրոնի դաճլիճը լեփ-լեցուն էր մեծ երգահանի երգի ու երաժշտության սիրահարներով:
Միջոցառման վարողը, ներկայացնելով Առնո Բաբաջանյանի վառ անհատականությունը, խոսեց ստեղծագործական առաջընթացով հագեցած նրա կյանքի մասին, արժևորեց այն բանաստեղծներին ու երգիչներին, ովքեր աշխարհին են ներկայացրել տարբեր ժանրերով նրա գործերը, որոնք հաստատվել են երաժշտության գանձարանում:
Հայաստանին և Երևանին սիրահարված ու բազում երգեր նվիրած երգահանի ստեղծագործությունները շնորհաշատ կատարողներ. Պ.Ադամյանի անվան թատրոնի դերասան Հենրիխ Պետրոսյանի, Վրաստանի հայ համայնքի «Վան» վոկալի ստուդիայի կատարող Նինա Կարապետյանի և Վիրահայոց թեմի «Հայարտուն» կենտրոնի «Ներսես Շնորհալի» մանկական երգչախմբի (խմբավար՝ Աիդա Բազոյան-Սուրմալյան, դաշնակահար՝ Կարեն Միրզոյան) գեղեցիկ կատարումներով արժանացան հանդիսատեսի ջերմ ընդունելությանը:
Առնո Բաբաջանյանը միշտ էլ բարձր գնահատելով հայ-վրացական բարեկամությունը, մեծ սիրով է հյուրընկալվել քաղաքամայր Թբիլիսիում: Եվ պատահական չէ, որ աշխարհի վեց քաղաքներից մեկում՝ Թբիլիսիում գործում է Վրաստանի Առնո Բաբաջանյանի անվան հասարակական հիմնադրամը՝ Թամազ Ղիփիանիի ղեկավարությամբ:
Առնո Բաբաջանյանի ստեղծագործությունների կատարումներով հանդես եկան դաշնակահար Եսայի Աբովյանը, Երևանից ժամանած «Երգ երգոց. Նոր ձայներ» նախագծի հաղթող Ինեսսա Ավագյանը, Երևանի կոնսերվատորիայի ուսանողուհի Կիմա Օհանյանը, երգի միջազգային մրցույթի Հայաստանի և Իսպանիայի մրցանակակիր Քրիստինե Ռեստակյանը:
Երևի կենդանության օրոք ճանաչված երաժշտի մտքով անգամ չէր անցնի, որ կգա ժամանակ, երբ նրա ստեղծագործությունները կհնչեն նաև հայ դասական Հովհ. Թումանյանի Թբիլիսյան նախկին բնակարանում, ինչն այսօր դարձավ իրականություն:
