Ճրագալույցի Սուրբ Պատարագ Վիրահայոց Թեմի եկեղեցիներում

2025 թվականի հունվարի 5-ի երեկոյան, Սուրբ Ծննդյան և Աստվածահայտնության առաջին տաղավար տոնի կապակցությամբ, Վիրահայոց Թեմի եկեղեցիներում մատուցվեց  Ճրագալույցի Սուրբ և Անմահ Պատարագ:

Նախատոնակ օրը բազմամարդ էին Հայոց եկեղեցիները: Ըստ ծիսական ավանդույթի,  հավատացյալները եկել էին առաջինը լսելու Տեր Հիսուս Քրիստոսի ծննդյան ավետիսը: Մինչ Սբ. Պատարագի սկսվելը, եկեղեցիներում կատարվեց Երեկոյան ժամերգություն, ընթերցվեցին օրվան հարիր Սուրբգրային տարբեր հատվածներ:

Հավատացյալներով լեցուն էր Թբիլիսիի Հավլաբարի Սուրբ Էջմիածին եկեղեցին, որտեղ Ճրագալույցի Սբ. Պատարագը մատուցեց Վիրահայոց թեմի առաջնորդ Գերաշնորհ Տեր Կիրակոս եպիսկոպոս Դավթյանը:

Հընթացս Սբ. Պատարագի, Թեմակալ առաջնորդն իր քարոզում անդրադարձ  կատարեց  Հիսուս Քրիստոսի Սուրբ Ծնունդի խորհրդին՝ որպես պարգև մարդկությանը մեղքերից ձերբազատվելու,  ցավերն ամոքելու, հույս և ապավեն դառնալու, մարդ արարածին դեպի Երկնային թագավորություն առաջնորդելու աստվածային ուղի:

Հավարտ Ս. Պատարագի Գրշ.  Տեր Կիրակոս եպիսկոպոս Դավթյանը  վառեց կենսատու մոմը, որը խորհրդանշում է նաև բեթղեհեմյան աստղի լույսը և մարդկանց  առաջնորդում է դեպի ճշմարիտ Լույսը, ու բաշխվեց հավատացյալներին: Նրանք եկեղեցում վառված ճրագներով իրենց հետ տարան Սուրբ Ծննդյան ավետիսը և աստվածային լույսը:

Սբ. Պատարագի արարողությունից հետո հոգևորականների թափորը շարժվեց դեպի թեմակալ առաջնորդի  «Հայարտուն» նստավայրը, որտեղ կատարվեց տնօրհնեքի կարգ:

Ճրագալույցի Սբ. Պատարագ մատուցվեց Թբիլիսիի Սբ. Գևորգ առաջնորդանիստ,  Բաթումիի Սբ. Փրկիչ, Ախալցիխեի Սբ. Գրիգոր Լուսավորիչ,  Ախալքալաքի Սուրբ խաչ,  Նինոծմինդայի Սբ. Սարգիս և  տարածաշրջանային մյուս հայոց եկեղեցիներում: