Սուրբ Հարության տոնը նշվեց Մառնեուլիի շրջանի երկու գյուղերում

2019 թվականի ապրիլի 21-ին Սուրբ Հարության ավետիսը տարածվեց նաև Վիրահայոց թեմի Մառնեուլիի շրջանում: Վիրահայոց թեմի Քվեմո Քարթլիի տարածաշրջանի հայ համայնքներում ծառայության կոչված հոգեշնորհ Տեր Զավեն վարդապետ Յազիչյանը տոնական Սուրբ և Անմահ Պատարագ մատուցեց Շահումյանի Սուրբ Աստվածածին եկեղեցում:
Հընթացս Սուրբ Պատարագի հոգեշնորհ Հայր Սուրբը անդրադարձ կատարեց Սուրբ Հարության խորհրդին որպես չարի դեմ բարու, խավարի դեմ լույսի հաղթանակ և հավատացյալներին փոխանցեց Վիրահայոց թեմի բարեխնամ առաջնորդ Գերաշնորհ Տեր Վազգեն եպիսկոպոս Միրզախանյանի հայրական օրհնությունն ու զատկական շնորհավորանքները:
Նույն օրը Հոգեշնորհ Տեր Զավեն վարդապետ Յազիչյանը երեկոյան ժամերգություն անցկացրեց Կարմիր գյուղի Սրբոց Ավետարանչաց մատուռում:
Եվ Շահումյանում և Կարմիր գյուղում Հայր Սուրբը եկեղեցական ծիսակատարություններից հետո մտերմական զրույցներ ունեցավ տեղի բնակչության հետ: