Վիրահայոց թեմի կրթամշակուկային կենտրոններում մեկնարկեց նոր ուսումնական տարին

Աշխարհով մեկ տարածված «Քովիդ-19» համավարակը արդեն երկրորդ տարին իր պայմաններն է թելադրում կրթական համակարգին, դարձնելով այն առցանց և աճող սերնդին զրկելով դասասենյակներում դասին մասնակցելու, ընկերների հետ շփվելու հնարավորությունից: 

Ուրախալի է, որ փոխելով ընթացակարգը,Վրաստանի  բոլոր տիպի կրթօջախներում 2021-2022 ուսումնական տարվա ուսուցումը վերստին մտավ իր սովորական հունի մեջ, այսինքն՝  մանկապարտեզները, դասասենյակները, լսարանները  իրենց դռները բացեցին սովորողների առջև: 

2021 թվականի հոկտեմբերի 5-ին արտակարգ ուրախություն էր տիրում Վիրահայոց թեմի «Հայարտուն» կրթամշակութային կենտրոնում, որտեղ նույնպես մեկնարկեց ուսումնական տարվա եռուզեռը:

Ընդունված ավանդույթի համաձայն, կենտրոնի «Սուրբ Մովսես Խորենացի» նախակրթարանի սաները, իրենց ծնողների հետ և ուսուցիչների ուղեկցությամբ Թբիլիսիի Սուրբ Էջմիածին եկեղեցում մասնակցեցին առավոտյան ժամերգությանը: 

Հավարտ ժամերգության  Թեմի փոխառաջնորդ հոգեշնորհ Տեր Նշան վարդապետ Հմայակյանի նախագահությամբ և արժանապատիվ Տեր Սամվել քահանա Թորոսյանի ու սարկավագ Եղիշե Հարությունյանի  մասնակցությամբ կատարվեց Մանուկների օրհնության կարգ: Փոխառաջնորդը փոխանցեց Վիրահայոց թեմի առաջնորդ հոգեշնորհ Տեր Կիրակոս վարդապետ Դավթյանի օրհնությունը  և ներկաներին շնորհավորեց նոր ուսումնական տարվա մեկնարկը:  Հայր Սուրբը արժևորեց հայոց դպրոցի և Եկեղեցու դերը Սփյուռքում հայի ինքնությունը, ազգայինը պահպանելու գործում, գնահատանքի խոսքեր ուղղեց սերունդների կրթության և դաստիարակության գործին նվիրված ուսուցիչներին, ծնողներին, Թեմի կրթության բաժնին, որտեղ գործող Սուրբ Մովսես Խորենացի նախակրթարանի սաները իրենց ուսումնառությունը շարունակում են մայրենի լեզվով կրթօջախներում, «Հայարտուն» կենտրոնին, որտեղ հայ դպրոցականը իր գիտելիքները լրացնում է ազգային մշակույթով: Հոգեշնորհ Հայր Սուրբը ոգեկոչեց դպրոցականներին՝ լավ սովորել, չխնայել ուժերը և եռանդով հաղթահարել ուսման դժվարությունները, քանզի միայն կրթությունն է լավ ապագայի գրավականը:

Տոնական օրը առավել ուրախ դարձավ նախակրթարանի սաների համար. «Հայարտուն» կենտրոնի ղեկավար Եվգենյա Մարկոսյանի նախաձեռնությամբ,  երեխաներին սպասում էր գեղեցիկ անակնկալ. նրանց ծանոթ Սպայդերմենը (Հենրիխ Պետրոսյան) և Զորոն (Արամ Միքայելյան) դիմավորեցին փոքրիկներին և անմիջապես ներգրավեցին տարբեր խաղերի մեջ, այնպես որ նորեկները անգամ լաց լինելու ժամանակ չունեցան:  

Շուրջ մեկամյա ընդմիջումից հետո Վիրահայոց թեմի «Սուրբ Մովսես Խորենացի» նախակրթարանում գործող երկու խմբերում ուրախ խաղերով, հետաքրքիր պարապմունքներով և զվարճալի մուլտֆիլմերով իրենց օրը կանցկացնեն երեք տասնյակից ավելի մանուկներ: Պարապմունքները սկսվեցին նաև  մյուս գեղարվեստական խմբերում:  

Այսօր իրենց սաներին ընդունեցին նաև  Վիրահայոց թեմի հովանու ներքո գործող Բաթումի «Ալեքսանդր Մանթաշյանց», Ռուսթավիի «Սուրբ  Գրիգոր Նարեկացի»,  Նինոծմինդայի «Ռաֆայել Ջավախ», Ախալքալաքի «Կարապետ արքեպիսկոպոս Բագրատունի», Ախալցիխեի «Վարդգես Սուրենյանց» կրթամշակութային և երիտասարդական կենտրոնները: Թեմի բոլոր կենտրոններում շարունակվում է ընդունելությունը ինչպես նախակրթարան, այնպես էլ տարբեր գեղարվեստական խմբեր: