Սայաթ-Նովյան ավանդական «Վարդատոնը» մեկնարկեց «Երգարանի» շնորհանդեսով

2022 թվականի մայիսի 28-ին Սայաթ-Նովային նվիրված ավանդական «Վարդատոնը» Թբիլիսիում մեկնարկեց Վիրահայոց թեմի «Հայարտուն» կենտրոնում Անմահ աշուղի 300-ամյակին նվիրված «Երգարանի» շնորհանդեսով: 

Շնորհանդեսին ներկա էր երգիչ-մանկավարժ, Երևանի պետական կոնսերվատորիայի դոցենտ Մուշեղ Հարությունյանը: Վերջինս անսալով հոգու կանչին՝ կազմել էր Սայաթ-Նովայի «Երգարանը» և այն արդեն իր  ընտրանիով ներկայացրել հանրությանը: Երգարանը, որն  ունի նաև  տողացի փոխադրություններ, ընդգրկում է Սայաթ-Նովայի 28 տաղ, ընդորում  երկու տաղը նաև վրացերեն տարբերակով:

«Երգարանի» շնորհանդեսին մասնակցեց նաև Երևանի աշուղական-ազգագրական երգի «Հայի կանչ» համույթը, որը երգիչ-մանկավարժ Հարությունյանի ղեկավարությամբ կազմվել է Երևանի Կոմիտասի անվան պետական կոնսերվատորիայի սովորողներից և Ռոմանոս Մելիքյանի անվան երաժշտական  քոլեջի սաներից:

 «Երգարանի» շնորհանդեսին ներկա էին Թբիլիսիի Սուրբ Էջմիածին եկեղեցու արժանապատիվ քահանաներ  Տեր Կիրակոս Սիմոնյանը, Տեր Հովսեփ Հարությունյանը, կինոռեժիսոր Օթարի Միքելաձեն, պրոդյուսեր Դավիթ Բեժիտաշվիլին, հասարակայնության ներկայացուցիչներ, Սայաթ-Նովայի երգի սիրահարներ: 

Վիրահայոց թեմի «Հայարտուն» կենտրոնի ղեկավար Եվգենյա Մարկոսյանի բարի գալուստի և համույթի ղեկավարի շնորհակալական խոսքից հետո Գալուստ Գյուլբենկյան դահլիճում տարածվեցին Անմահ Սայաթ-Նովայի միշտ արդիական տաղերը շնորհաշատ  մեներգիչների կատարմամբ և ժողովրդական գործիքների ու դաշնամուրի  նվագակցությամբ:

Ախորժալուր և սրտամոտ համերգի ավարտին, կազմակերպիչ դոցենտ Հարությունյանը շնորհակալություն հայտնեց Հայ Օգնության Միության Երևանի շրջանային վարչությանը և «Մայադ տուր» տուրիստական ընկերությանը «Երգարանի» հրատարակությանը և Թբիլիսի այցելությանը ցուցաբերած աջակցության համար: 

Համերգի ավարտին արժ. Տեր Կիրակոս քահանա Սիմոնյանը փոխանցեց  Վիրահայոց թեմի առաջնորդական տեղապահ հգշ. Տեր Կիրակոս վրդ. Դավթյանի հայրական օրհնությունը,  Մուշեղ Հարությունյանին և նրա ղեկավարած «Հայի կանչ» համույթին մաղթեց հայ գուսանական երգի, ժողովրդական երգարվեստի անաղարտության պահպանում, երկու մայրաքաղաքների մշակութային օջախների համագործակցության խորացում և հետագա զարգացում:  

Ի հիշատակ գեղեցիկ օրվա, ներկաները ստացան Սայաթ-Նովայի «Երգարանները» Մուշեղ Հարությունյանի մակագրությամբ: