Վիրահայոց թեմում նշվեց Սեբաստացի քառասուն մանկանց հիշատակի օրը

Հայ Առաքելական Սուրբ եկեղեցին Մեծ Պահքի չորրորդ շաբաթ օրը ոգեկոչում է Սեբաստիայում նահատակված սուրբ քառասուն մանուկների հիշատակը:

2025 թվականի մարտի 29-ին, Վիրահայոց թեմի Թբիլիսիի Սբ. Գևորգ առաջնորդանիաստ և Հավլաբարի Սուրբ Էջմիածին եկեղեցիներում առավոտյան ժամերգության ժամանակ  վառվեցին ծաղիկներով զարդարված մոմերը՝ ի հիշատակ նահատակված քառասուն մանկանց:  40 վառվող մոմերով զարդարված սեղանը խորհրդանշորեն մանուկ վկաների հավատարմությունն էր քրիստոնյա հավատին,  նրանց նահատակությունը, որ երևում էր լուսե պսակներով: Իսկ տանջանքներին չդիմացող նահատակի մոմը, որ մնացել էր առանց ծաղկի, խորհրդանշում էր նրա զրկվելը երկրային և երկնային կյանքից:

Հավարտ ժամերգության, եկեղեցիների հոգևոր հայրերը հավուր պատշաճի քարոզ խոսեցին օրվա խորհրդի՝ Սեբաստիայում նահատակված և սրբացած 40 մանուկների մասին և մանկանց պատմության օրինակով ներկաներին հորդորեցին կյանքի բոլոր դժվարությունների մեջ անգամ հավատարիմ մնալ Քրիստոսի հավատին, ապրել սիրով, լինել բարի ու զոհաբերության պատրաստ երկնային պսակին արժանանալու նվիրումով:

Այնուհետև սարկավագների կողմից ընթերցվեց Սեբաստացի 40 վկաների պատմությունը:Հավարտ ժամերգության  հոգևոր հայրերի կողմից կատարվեց բուսական յուղի ավանդական օրհնություն և բաժանվեց հավատացյալներին:

Սեբաստացի քառասուն մանկանց հիշատակի օրը նշվեց Վիրահայոց թեմի գործող եկեղեցիներում: