Հայերեն 
ქართული 
English 
Русский 
«Կետից մինչև կետ» խորագրով ցուցահանդես Վիրահայոց թեմի «Հայարտուն» կենտրոնում
2025 թվականի մարտի 29-ին, Վիրահայոց թեմի առաջնորդ Գրշ. Տեր Կիրակոս եպս. Դավթյանի օրհնությամբ, «Հայարտուն» կենտրոնում (տնօրեն՝ Եվգենյա Մարկոսյան)բացվեց երիտասարդ նկարչուհի Աննա Թորոսյանի գրաֆիկական աշխատանքների ցուցահանդեսը:
Հինգ տասնյակից ավելի սյուրռեալիզմի ոճի գործերը խոհական, փիլիսոփայական, պատրանքային հստակ իրողությամբ, կատարողական և տեխնիկական բարձր հմտությամբ, աշխատատար համբերությամբ հավաքագրվելով և ստանալով բովանդակություն, ներուժ, տարբեր գաղափարներ արտացոլելու ունակություն, վկայում էին ստեղծագործողի երևակայության լայն մտահորիզոնի մասին:
Աննա Թորոսյանը դեռևս Հայաստանի Գեղարվեստի ակադեմիայի կերպարվեստի գրաֆիկական բաժնում սովորելիս, զգում է, որ միայն մարդուն կերտելը չի բավարարում իր ներաշխարհից եկող գաղափարները արտահայտելուն, և ահա դիմում է կետին՝ ցույց տալով նրա թաքնված կարողությունը` ցանկացած բան և ցանկացած երևույթ՝ «ծնունդից մինչև մահ» սկսվում է մի կետից և ավարտվում մեկ այլ կետում։
Թբիլիսահայ արվեստագետներ Մայիս Կիրակոսյանը, Արտյոմ Կիրակոզովը, Էդուարդ Միրզոյանը և ուրիշներ, կիսվելով ցուցահանդեսից ստացած իրենց տպավորություններով, բարձր գնահատեցին ներկայացված աշխատանքները, որոնք կետերի միջոցով սիմետրիկորեն համախմբվելով և ստանալով տարբեր ձև, նոր աշխարհ էին բացում դիտողի առջև:
Երիտասարդ նկարիչը մասնակցելով տարբեր ցուցահանդեսների Հայաստանում և Հայաստանից դուրս, պատվաբեր անվանեց թբիլիսահայ արվեստասեր հասարակայնության առջև իր գործերով ներկայանալը և շնորհակալություն հայտնեց ստացած բարձր գնահատականի համար:
