Ճրագալույցի Սուրբ Պատարագ Վիրահայոց թեմի Սբ. Էջմիածին եկեղեցում

2025 թվականի ապրիլի 19-ին, Ավագ շաբաթ օրը երեկոյան, Հիսուս Քրիստոսի հրաշափառ Սուրբ Հարության տոնի առիթով, Վիրահայոց թեմի եկեղեցիներում մատուցվեց ճրագալույցի Սբ. Պատարագ:

Թբիլիսիի Հավլաբարի Սուրբ Էջմիածին  եկեղեցին  ու բակը լեփ-լեցուն էր մարդկանցով:  Նրանք գալիս էին ընտանիքներով, գալիս էին առաջինը լսելու մարդկության Փրկչի Հարության ավետիսը: Ճրագալույցի Սբ. Պատարագը մատուցեց  Վիրահայոց թեմի առաջնորդ Գերաշնորհ Տեր Կիրակոս  եպիսկոպոս Դավթյանը:

Նախատոնակից հետո Պատարագիչ Սրբազանը ազդարարեց Փրկչի հրաշափառ Հարության ավետիսը: Հավատացյալները սիրով միմյանց շնորհավորեցին Մեր Տեր Հիսուս Քրիստոսի մեռելներից կենդանություն առնելու համար:

Հավարտ Սուրբ Պատարագի Թեմակալ առաջնորդը իր քարոզ խոսքում  անդրադարձ կատարեց դատապարտելի մարտահրավերներով առլեցուն առօրյա կյանքին, շարունակվող պատերազմներին,  տարածվող մահվան ու աղետի սարսափին:   Բայց Հիսուս Քրիստոսի Սբ. Հարությունը այն հավատքն ու հույսն է ներշնչում, որ արդարությունը  հաստատվելու է,    գալու է բարու հաղթանակը, ինչպես եղավ Հիսուս Քրիստոսի Սուրբ Հարությամբ և չարի պարտությամբ:

 Գրշ. Տեր Կիրակոս եպիսկոպոսը  հավատացյալներին շնորհավորեց Սուրբ Հարության տոնի առիթով, բարեմաղթեց Վրաստան և Հայաստան աշխարհներին խաղաղություն, ռազմագերիներին ազատություն, տարհանվածներին վերադարձ իրենց տները, երկրներին առաջընթաց ու զարգացում:

Սբ. Պատարագի ավարտին հավատացյալները իջեցված աշտանակի մոմից վառեցին իրենց մոմերը և Փրկչի օրհնությունն ստացած վերադարձան տները, տանելով Տիրոջ Հարության Սբ․ Լույսը։ Այնուհետև կատարվեց Սուրբ Հարության տոնից հետո առաջին տնօրհնեքի արարողությունը: Հավլաբարի առաջնորդական նստավայրում օրհնվեցին հացը, ջուրը և աղը:

Ժողովրդի այցը եկեղեցի շարունակվեց մինչև կեսգիշեր: