Սբ. Ծննդյան ավետիսը տարածվեց Վիրահայոց թեմի եկեղեցիներում

2026 թվականի հունվարի 5-ի երեկոյան, Սուրբ Ծննդյան և Աստվածահայտնության առաջին տաղավար տոնի կապակցությամբ Վիրահայոց Թեմի եկեղեցիներում մատուցվեց Ճրագալույցի Սուրբ և Անմահ Պատարագ:

Մինչ Սբ. Պատարագի սկսվելը, եկեղեցիներում կատարվեց Երեկոյան ժամերգություն, ընթերցվեցին Սուրգգրային տարբեր հատվածներ:  

Թբիլիսիի Հավլաբարի Սուրբ Էջմիածին եկեղեցում  Ճրագալույցի Սբ. Պատարագը մատուցվեց Վիրահայոց թեմի առաջնորդ Գերաշնորհ Տեր Կիրակոս եպիսկոպոս Դավթյանի հանդիսապետությամբ: Պատարագիչն էր արժ. Տեր Կիրակոս քահանա Սիմոնյանը:

Հընթացս Սբ. Պատարագի, Թեմակալ առաջնորդն իր քարոզում անդրադարձ  կատարեց  Հիսուս Քրիստոսի Սուրբ Ծննդի խորհրդին՝ որպես պարգև մարդկությանը՝ մեղքերից ազատվելու, բազում մարտահրավերները և Հայոց Եկեղեցու պառակտումը հաղթահարելու ճշմարիտ Աստվածային ուղի:

Հավարտ Սբ. Պատարագի Գրշ. Տեր Կիրակոս եպս. Դավթյանը  վառեց կենսատու մոմը, որը խորհրդանշում է նաև բեթղեհեմյան աստղի լույսը և մարդկանց  առաջնորդում է դեպի ճշմարիտ Աստվածային  օրհնությունը: Կենսատու մոմի լույսը բաշխվեց հավատացյալներին: Նրանք եկեղեցում վառված ճրագներով իրենց հետ տարան Սուրբ Ծննդյան ավետիսը և Աստվածային լույսը:  

Սբ. Պատարագի արարողությունից հետո հոգևորականների թափորը, թեմակալ առաջնորդի գլխավորությամբ,  կատարեց տնօրհնեքի կարգ առաջնորդի  «Հայարտուն» նստավայրում:

Ճրագալույցի Սբ. Պատարագ մատուցվեց Թբիլիսիի Սբ. Գևորգ առաջնորդանիստ,  Բաթումիի Սբ. Փրկիչ, Ախալցիխեի Սբ. Գրիգոր Լուսավորիչ,  Ախալքալաքի Սուրբ խաչ,  Նինոծմինդայի Սբ. Սարգիս և  տարածաշրջանի մյուս հայոց եկեղեցիներում: