Վիրահայոց թեմի Երիտասարդական բաժինը մասնակցեց շախմատի գծով թիմային մրցույթին

Վրաստանի Շախմատի դաշնության և Կրոնի հարցերով պետական գործակալության կազմակերպմամբ, Թբիլիսիի «Մերանի» շախմատային ակումբում անցկացվեց կրոնական կազմակերպությունների միջև շախմատի գծով Վրաստանի հինգերորդ թիմային առաջնությունը:

Մրցույթին մասնակցում էին Վրաստանում գործող տասը կրոնական կազմակերպություններ: Վիրահայոց թեմի առաջնորդ Գրշ. Տեր Կիրակոս եպս. Դավթյանի օրհնությամբ և բարեմաղթանքով, Վիրահայոց թեմի Երիտասարդական բաժինը՝ ղեկավար Էմիլ Սարգսյանի գլխավորությամբ մասնակցեց մրցույթին: Թեմը ներկայացրին Սոնա Կարախանյանը, Մերուժան Լորեցյանը, Անդրեաս Պարոնյանը և Արշալույս Տոնոյանը:

Մրցույթի հաղթող դարձավ Վրաստանի Առաքելական Ավտոկեֆալ Ուղղափառ Եկեղեցու թիմը, Վիրահայոց թեմի երիտասարդական թիմը զբաղեցրեց առաջնության երկրորդ տեղը, իսկ երրորդ տեղը գրավեց Վրաստանի Ավետարանական Հավատի Եկեղեցու թիմը։

Մասնակիցներին փոխանցվեցին հավաստագրեր, գավաթներ և հուշանվերներ։