Խոկում՝ միասնական աղոթք Թբիլիսիի Սուրբ Գևորգ առաջնորդանիստ եկեղեցում

2025 թվականի ապրիլի 16-ին,  Վիրահայոց թեմի Սբ. Գևորգ առաջնորդանիստ եկեղեցում,  թեմակալ առաջնորդ Գրշ. Տեր Կիրակոս եպս. Դավթյանի օրհնությամբ, տեղի ունեցավ Խոկում, բարձրացվեց միասնական աղոթք:

Արարողությունն  այս տարի  իրականացվեց չարչարանաց շաբաթվա  երրորդ օրը՝ չորեքշաբթի:

Ներկա հավատացյալներն ունկնդիրը դարձան քահանաների, սարկավագների և դպիրների կողմից սաղմոսների և աղոթքների ընթերցանությանը:

Վիրահայոց թեմի արժանապատիվ Տեր Հուսիկ քահանա Հարությունյանի  խոսքը ուղղված ներկաներին խորհրդածության առիթ ընձեռեց: Վերջինս  անդրադարձ կատարելով Հիսուս Քրիստոսի  Ավագ շաբաթվա օրերին կրած տանջանքներին ու չարչարանքներին, հորդորեց ներկաներին՝ հավատարիմ մնալ մեր Աստծուն, Հիսուս Քրիստոսի պատվիրաններին, սիրել մեկս մյուսին, նվիրվել մեր հայրենիքին, սիրել մեր ազգը և ապրել մեր հավատքով:

Հավատացյալները ծնկաչոք  խորհրդածում էին՝ խոկում քար լռության մեջ  Տեր Հուսիկ քահանայի  խոսքերի շուրջ, և յուրաքանչյուրը մտովի աղոթք էր բարձրացնում առ Աստված, հայցելով երկրներին խաղաղություն, ռազմագերիներին ազատություն, տարհանվածներին վերադարձ իրենց տները  և մարդկանց՝ արևշատ օրեր:

Խոկումը գեղեցկացավ երգչախմբի հոգեթով երգեցողությամբ և ավարտվեց հոգևոր դասի մաղթանք-աղոթքով։