Հայերեն 
ქართული 
English 
Русский 
Հիսուս Քրիստոսի Սուրբ Հարության տոնը՝ Վիրահայոց թեմի առաջնորդանիստ եկեղեցում
2025 թվականի ապրիլի 20-ին Քրիստոնյա աշխարհը տոնեց Մեր Տեր Հիսուս Քրիստոսի Սուրբ Հարության տոնը:
Բազմամարդ էր Վիրահայոց թեմի Սուրբ Գևորգ առաջնորդանիստ եկեղեցին: Տոնական օրը մեկնարկեց առավոտյան ժամերգությամբ, Անդաստանի արարողությամբ:
Հիսուս Քրիստոսի հրաշափառ Հարության տոնի կապակցությամբ, Սուրբ Պատարագ մատուցեց Վիրահայոց թեմի առաջնորդ Գերաշնորհ Տեր Կիրակոս եպիսկոպոս Դավթյանը:
Հընթացս Սուրբ Պատարագի Պատարագիչ Սրբազան Հայրը ընթերցեց Ն.Ս.Օ.Տ.Տ. Գարեգին Բ Ամենայն հայոց կաթողիկոսի զատկական ուղերձը:
Հավարտ Սուրբ և Անմահ Պատարագի, Թեմակալ առաջնորդը շնորհավորեց հավատացյալներին Սբ. Հարության տոնի՝ չարի դեմ բարու, խավարի դեմ լույսի հաղթանակի կապակցությամբ, օրհնեց զատկական խորհրդանիշը՝ ներկած հավկիթները:
Պահպանիչ աղոթքից հետո, եկեղեցու բակում տոնական սեղանին բազմեցին ներկած հավկիթները և ծայր առավ ձվակռիվը, որին ընդգրկվեցին ահելներն ու ջահելները, ուրախությունը մեծ էր երեխաների շրջանում:
Երկուշաբթի օրը, Սբ. Պատարագից հետո ՀԻՇԱՏԱԿ ՄԵՌԵԼՈՑ կկատարվի հոգեհանգստյան կարգ:
